އެމެރިކާގެ ކަނޑުގެ ސިފައިން ބޭނުންކުރާ އިންސާނަކާ ނުލައި ދުއްވާ އުޅަނދެއް ކަމަށްވާ "AEGIR-W"، ކޮންޓްރޯލް ގެއްލުމުގެ ސަބަބުން ތުރުކީގެ އޯޑޫ ޕްރޮވިންސްގެ އުންޔޭ ގޮނޑުދޮށަށް އުރިއްޖެއެވެ.

ކަޅު ކަނޑުގެ އައްސޭރިފަށަށް މި އުޅަނދު ލައްގާފައި އޮއްވާ ފެނިފައިވަނީ މިދިޔަ ހުކުރު ދުވަހުއެވެ.

Ad by Hajj Corporation

މި ހާދިސާއާ ގުޅިގެން ތުރުކީގެ ކަމާބެހޭ ފަރާތްތަކުން ވަނީ ވަގުތުން ފިޔަވަޅު އަޅާފައެވެ. އެގޮތުން އޯޑޫ ޕްރޮވިންސްގެ ޖެންޑާމަރީން އެ ސަރަހައްދުގެ ގޮނޑުދޮށް ބަންދުކޮށް، އިސްތަންބޫލްގެ އެސް.އޭ.އެސް (އަންޑަރވޯޓަރ ޑިފެންސް) ގްރޫޕް ކޮމާންޑްގެ މާހިރުން ވަނީ އުޅަނދު ބަލައި ފާސްކޮށްފައެވެ.

މި ބަލައި ފާސްކުރުންތަކުން އެނގުނު ގޮތުގައި، ގާތްގަނޑަކަށް 10 މީޓަރު ދިގު މި އުޅަނދު އޭރުވެސް މަސައްކަތް ކުރަމުންދިޔައިރު، އޭގައި ނުރައްކާތެރި ގޮވާތަކެތި ހުއްޓެވެ.

އުޅަނދުގައި ހުރި ނާޒުކު ޓެކްނޮލޮޖީ އެހެން ބަޔަކަށް ފޯރިޔަ ނުދިނުމަށާއި، ނުބައި ވަގުތެއްގައި ގޮވުމުގެ ނުރައްކާ ކުޑަކުރުމަށްޓަކައި ތުރުކީގެ އަސްކަރިއްޔާއިން ވަނީ ހާއްސަ އޮޕަރޭޝަނެއް ހިންގާފައެވެ. މިގޮތުން، ހޮނިހިރު ދުވަހުގެ މެންދުރުފަހު 2:00 ހާއިރު، އައްސޭރިން ދެ މޭލު ބޭރަށް އުޅަނދު ގެންގޮސް ކޮންޓްރޯލްޑް ބްލާސްޓެއްގައި ވަނީ ގޮއްވާލާފައެވެ.

އުޅަނދުގެ ގާބިލުކަމާއި ބޭނުން

ސިއެރާ ނެވާޑާ ކޯޕަރޭޝަން (SNC) އިން އުފައްދާފައިވާ AEGIR-W އަކީ ޖާސޫސީ މައުލޫމާތު އެއްކުރުމަށާއި (ISR)، އިލެކްޓްރޯނިކް ވޯފެއާ އަދި ހަމަލާދިނުމުގެ މިޝަންތަކަށް ފަރުމާކޮށްފައިވާ މަތީ ފެންވަރުގެ އޮޓޮނޮމަސް ޕްލެޓްފޯމެކެވެ. މި އުޅަނދަކީ ގަޑިއަކު 25 ނޮޓްސްއަށް ވުރެ ބާރަށް ދަތުރުކުރުމުގެ ގާބިލުކަން ލިބިފައިވާ، އަދި 300 ކިލޯގެ ޕޭލޯޑް އުފުލޭ އުޅަނދެކެވެ.

މި ހާދިސާއަކީ ޖިއޯޕޮލިޓިކަލް ގޮތުން ނާޒުކު ވަގުތެއްގައި ހިނގި ކަމެއްގެ ގޮތުގައި މަސްރަހު ދިރާސާކުރާ ފަރާތްތަކުން ފާހަގަކުރެއެވެ. ރިޕޯޓްތައް ބުނާގޮތުގައި، މި އުޅަނދަކީ ރަޝިޔާގެ ބްލެކް ސީ ފްލީޓާ ދެކޮޅަށް ބޭނުންކުރާނެ ކަނޑުގެ އުކުޅުތައް ޓެސްޓުކުރުމުގައި ބޭނުންކުރި އުޅަނދެކެވެ. ނަމަވެސް އެމެރިކާގެ އޮޕަރޭޓަރުންނާ ގުޅުން ކެނޑުމުގެ ސަބަބުން އުޅަނދު ވަނީ އޮޔާ ގޮސް ތުރުކީގެ އައްސޭރިއަށް ލައްގާފައެވެ.

ކަޅު ކަނޑުގެ ސަލާމަތީ ކަންކަން މިނިވަންކަމާއެކު ބެލެހެއްޓުމަށް ތުރުކީން ވަކާލާތު ކުރަމުންދާ ދަނޑިވަޅެއްގައި، ހުއްދައެއް ނެތި އެމެރިކާގެ ހަތިޔާރު އެޅި ޑްރޯން ބޯޓެއް އެގައުމުގެ ގޮނޑުދޮށަށް ލެއްގުމަކީ ތުރުކީގެ ދިފާއީ ބާރުތަކުން ސީރިއަސްކޮށް ބަލަމުންދާ މައްސަލައެކެވެ.