ރޮނާލްޑް އަރައުހޯ ކާމިޔާބުކުރި ހަމައެކަނި ލަނޑާއެކު، ރަޔޯ ވަޔެކާނޯގެ މައްޗަށް 1-0 އިން ކުރިހޯދައި ބާސެލޯނާއިން ލަލީގާ ތާވަލުގެ ކުރީގައި ހަތް ޕޮއިންޓުގެ ލީޑެއް ނަގައިފިއެވެ. ކޭމްޕް ނޯގައި ކުޅުނު މި މެޗުން މޮޅުވެ، ހަންސީ ފްލިކްގެ އިރުޝާދުގެ ދަށުން ކުޅޭ ބާސެލޯނާއިން ވަނީ ލީގުގައި ޖެހިޖެހިގެން ފަސްވަނަ މޮޅު ހޯދާފައެވެ.

މެޗުގެ ފުރަތަމަ މިނެޓުގައި ވަޔެކާނޯއިން ވަނީ ލަނޑެއް ޖެހުމާ ވަރަށް ގާތަށް ގޮސްފައެވެ. ނަމަވެސް އެ ޓީމުގެ ކާލޯސް މާޓިން ފޮނުވާލި ނުރައްކާތެރި ހަމަލާ ބާސެލޯނާގެ ކީޕަރު ޖޯން ގާސިއާ ވަނީ ހުށިޔާރުކަމާއެކު ދިފާއުކޮށްފައެވެ. މެޗުގެ 24 ވަނަ މިނެޓުގައި ބާސެލޯނާއަށް ލީޑު ނަގައިދިނީ ޔާއޯ ކަންސޭލޯ ނަގައިދިން ކޯނަރަކުން ބޮލުން ފޮނުވާލި ހަމަލާއަކުން ކެޕްޓަން އަރައުހޯއެވެ.

Ad by Hajj Corporation

ބާސެލޯނާގެ ރަފީނިއާއަށް ލަނޑު ޖަހާނެ ރަނގަޅު ފުރުސަތުތަކެއް ލިބުނު ނަމަވެސް، ވަޔެކާނޯގެ ކީޕަރު ބަޓާލާ ވަނީ އޭނާގެ ހަމަލާތައް ހުއްޓުވާފައެވެ. އަދި މެޗުގެ 57 ވަނަ މިނެޓުގައި ލަމީން ޔަމާލް ފޮނުވާލި ބޯޅަ ދިޔައީ ގޯލުގެ ދަނޑި ކައިރިން ބޭރަށެވެ. މެޗުގެ ފަހުކޮޅު ވަޔެކާނޯއިން ނަތީޖާ ހަމަހަމަކުރުމަށް ގިނަ މަސައްކަތްތަކެއް ކުރިއެވެ. އެގޮތުން 89 ވަނަ މިނެޓުގައި ހޯޖޭ ޑި ފްރުޓޯސް ފޮނުވާލި ނުރައްކާތެރި ބޯޅަ ކީޕަރު ގާސިއާ ވަނީ ދިފާއުކޮށްފައެވެ.

މި މޮޅާއެކު ބާސެލޯނާއިން ވަނީ އަމިއްލަ ދަނޑުގައި ވަޔެކާނޯއާ ދެކޮޅަށް ލަނޑެއް ނުވަދެ ޖެހިޖެހިގެން ހަތަރު މެޗު ފުރިހަމަކޮށްފައެވެ. މިއީ 1993 އާއި 1997 އާ ދެމެދު އެ ޓީމުން ހަދާފައިވާ ރެކޯޑާ އެއްވަރުގެ ކާމިޔާބީއެކެވެ. މީގެ އިތުރުން، މި ސީޒަނުގައި ލީގުގައި އަމިއްލަ ދަނޑުގައި ކުޅުނު 15 މެޗުންވެސް ބާސެލޯނާ ވަނީ މޮޅުވެފައެވެ.

ޔޫރަޕުގެ ގަދަ ފަސް ލީގަށް ބަލާއިރު، 21 ވަނަ ގަރުނުގައި މިއަށްވުރެ ރަނގަޅު ރެކޯޑެއް އޮތީ ހަމައެކަނި ޔުވެންޓަސް އަތުގައެވެ. އެއީ 2013-14 ސީޒަނުގައި އަމިއްލަ ދަނޑުގައި ކުޅުނު 19 މެޗުންވެސް މޮޅުވެގެންނެވެ. އަދި ބާސެލޯނާއިން މިހާރު ވަނީ ހުރިހާ މުބާރާތެއް ހިމެނޭހެން އަމިއްލަ ދަނޑުގައި ކުޅުނު ފަހުގެ 39 މެޗުގައިވެސް ލަނޑު ޖަހާފައެވެ.

މެޗުގެ ހީރޯ އަރައުހޯ ކާމިޔާބުކުރި މި ލަނޑަކީ މި ސީޒަނުގެ ލަލީގާގައި އޭނާ ޖެހި ތިންވަނަ ލަނޑެވެ. މިއީ އެއް ސީޒަނެއްގައި އޭނާއަށް އެންމެ ގިނަ ލަނޑު ޖެހުނު ދެވަނަ ފަހަރެވެ. 2021-22 ސީޒަނުގައި އޭނާ ވަނީ ހަތަރު ލަނޑު ކާމިޔާބުކޮށްފައެވެ.