އައު މަޝްރޫޢުތައް ފެށުމުގައިވެސް ބޯހިޔާވަހިކަމާއި ސިއްޙީ ދާއިރާގެ މަޝްރޫޢުތަކަށް މަޑުޖެހުމެއް ނުގެންނަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި އެމަނިކުފާނު ވަނީ ރާއްޖޭގައި އެކި މޮޑެލްތަކަށް މަޝްރޫޢުތައް ކުރިއަށްދާކަން ފާހަގަކުރައްވާފައެވެ. އެގޮތުން ހިލޭ އެހީގެ މަޝްރޫއުތަކާއި ބޭރުގެ ލޯނުގައި ހިންގާ މަސައްކަތްތަކާއި އަދި ކޮންޓްރެކްޓަރ ފައިނޭނެސް މޮޑެލްއަށް ގެންދާ މަސައްކަތްތަކަށް މަޑުޖެހުމެއް ނާންނާނެކަމަށް ވަނީ ވިދާޅުވިއެވެ.

Ad by Hajj Corporation

މީގެއިތުރުން މިއަހަރުގެ ބަޖެޓުގައި ހިމަނާފަވާ އެއްވެސް މަސައްކަތެއް ހުއްޓާނުލާ ކުރިއަށްގެންދިއުމަށް ސަރުކާރުން ވަރަށް ބޮޑު އިސްކަމެއް ދޭނެކަމަށާއި ކޮންޓްރެކްޓަރުންނަށް ދޭންވާ ފައިސާވެސް ދިނުމާއެކު، މަސައްކަތްތައް ނުހުއްޓި ގެންދެވޭނެގޮތަށް ކަންކަން ހަމަޖައްސަމުންދާކަމަށް ވިދާޅުވިއެވެ. އެހެން ނޫންނަމަ، މަސައްކަތްތައް ހުއްޓި، މުޅި ޤައުމު ހުއްޓުމަކަށް އައިސް އޭގެ ގެއްލުން ވާނެކަމަށް ވިދާޅުވިއެވެ.

ރައީސް އިތުރަށް ވިދާޅުވީ ރިޔާސީ އިންތިޚާބުގައި ވަޢުދުވީ މެޖޯރިޓި މަޝްރޫއު ވަނީ ސޮއިކޮށްފައި ކަމަށާއި މިހާރު ބާކީ %35- %40 މަޝްރޫޢުގެ މަސައްކަތް ކަމަށެވެ. އަދި ދެން ބަލާނީ ޕްރިއޯރިޓީ ދޭންވީ މަސައްކަތްތަކަކީ ކޮބާތޯކަމަށް ވެސް ރައީސް ވިދާޅުވިއެވެ. އެންމެ މުހިންމީ ބޯހިޔާވަހިކަތާ ސިއްޙީ ދާއިރާގެ މަސައްކަތްތައް. އާ މަޝްރޫޢުތައް ފެށުމުގައިވެސް މި ދާއިރާތަކުގެ މަސައްކަތް މަޑުނުޖެހޭނެ." ރައީސް ވިދާޅުވިއެވެ.

ރައީސް ވިދާޅުވީ ރާއްޖޭގެ ޙާލަތަށް އަންނަމުންދާ ބަދަލުތައް ވަރަށް ގާތުން ބަލަމުންދާކަމަށެވެ. މަސައްކަތްތައް ތަރުތީބުކޮށް ބަދަލުތައް ގެންނާނީ ޙާލަތަށް އަންނަމުންދާ ބަދަލުތައް ބެލުމަށްފަހުގައިކަމަށް ރައީސް ވިދާޅުވިއެވެ.