އީރާނާއި އެމެރިކާއާ ދެމެދު ހިނގަމުންދާ ހަނގުރާމައަށް ހަތަރު ހަފުތާ ފުރުނުއިރު، އެމެރިކާއިން އީރާނާއެކު ޑިޕްލޮމެޓިކް މަޝްވަރާތައް ފަށާފައިވާ ކަމަށް ރައީސް ޑޮނަލްޑް ޓްރަމްޕް ވިދާޅުވި ވިދާޅުވުން އީރާނުން ދޮގުކޮށްފިއެވެ.

ހޯމަ ދުވަހު ޓްރަމްޕް ވިދާޅުވީ އީރާނުގެ އިންޖީނުގެތަކާއި ހަކަތައާ ބެހޭ އިންފްރާސްޓްރަކްޗަރަށް ދެމުންދާ ހަމަލާތައް ފަސް ދުވަހުގެ މުއްދަތަށް މެދުކަނޑާލުމަށް ނިންމާފައިވާ ކަމަށެވެ.

Ad by Hajj Corporation

މިކަމާ ގުޅިގެން އީރާނުގެ ޚާރިޖީ ވަޒީރު އައްބާސް އަރަގްޗީ އާއި އެ ގައުމުގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ، "ޓްރަމްޕާ އެކު ސީދާ ގޮތުންނާއި ނުސީދާ ގޮތުން ވެސް އެއްވެސް މުއާމަލާތެއް ކޮށްފައެއް ނުވާނެ" ކަމަށެވެ. އީރާނުގެ އޮފިޝަލުން ވަނީ ޓްރަމްޕްގެ ވާހަކަފުޅުތަކަކީ އެއްވެސް ހަގީގަތެއް ނެތް އިތުރުފުޅުތަކެއްގެ ގޮތުގައި ސިފަކުރައްވާފައެވެ.

އީރާނުގެ އޮފިޝަލުން ގަބޫލުކުރައްވާ ގޮތުގައި ޓްރަމްޕްގެ މި ބަޔާނަކީ ދުނިޔޭގެ ހަކަތައިގެ އަގުތައް ދަށްކުރުމަށާއި، އެމެރިކާ އާއި އިސްރާއީލުގެ އަސްކަރީ ބާރުތައް އަލުން ތަރުތީބުކުރުމަށް ވަގުތު ހޯދުމަށް ކުރި "މަކަރުވެރި މަސައްކަތެއް" ކަމަށެވެ. މިއީ ހަނގުރާމައިގެ މައިދާނުގައި ކުރިމަތިވަމުންދާ ގޮންޖެހުންތަކުން ސަލާމަތްވުމަށް އެމެރިކާއިން ބޭނުންކުރި އުކުޅެއް ކަމަށް އީރާނުން ތުހުމަތުކުރެއެވެ.

އީރާނުގެ ދައުލަތުގެ މީޑިއާތައް ކަމަށްވާ ތަސްނީމް އަދި ފާރްސް ނިއުސް އިން މި ހަމަލާތައް މެދުކަނޑާލުމުގެ ވާހަކަ ސިފަކުރަނީ ޑިޕްލޮމެޓިކް ފުރުސަތެއްގެ ގޮތުގައެއް ނޫނެވެ. އޭގެ ބަދަލުގައި އެއީ އެމެރިކާ ފަހަތަށް ޖެހުމެއްގެ ގޮތުގައި އެ މީޑިއާތަކުން ބުނެއެވެ. އީރާނުން ބުނާ ގޮތުގައި ޓްރަމްޕް މިފަދަ ނިންމުމެއް ނިންމެވީ، އެމެރިކާގެ ބޭސްތަކާއި ސަރަހައްދީ ފެން ސާފުކުރާ ޕްލާންޓްތަކަށް އަމާޒުކޮށް އީރާނުން ދިން އިންޒާރުތަކުގެ ސަބަބުންނެވެ.

އީރާނުން ދީފައިވާ "ބާރަށް ބާރު" ގެ އިންޒާރަކީ ހަގީގީ ނުރައްކަލެއް ކަމަށް އެމެރިކާއަށް ގަބޫލުކުރެވުމަކީ، ހަމަލާތައް މެދުކަނޑާލަން އުޅޭކަމަށް ޓްރަމްޕް ވިދާޅުވި އަސްލު ސަބަބު ކަމަށް އީރާނުގެ މަސްދަރުތަކުން ބުނެއެވެ. މި މައްސަލައިގައި ދެ ގައުމުގެ ދެމެދުގައި އޮތް ނުތަނަވަސްކަން އިތުރަށް ބޮޑުވެފައިވާއިރު، މަޝްވަރާގެ އެއްވެސް ދޮރެއް ހުޅުވިފައި ނުވާކަން އީރާނުން ވަނީ ކަށަވަރުކޮށްދީފައެވެ.