ޕޯޗުގަލްގެ ގައުމީ ޓީމުގެ ކެޕްޓަން އަދި އަލް-ނަސްރުގެ ފޯވާޑް ކްރިސްޓިއާނޯ ރޮނާލްޑޯގެ ދަރިފުޅު، ކްރިސްޓިއާނޯ ރޮނާލްޑޯ ޖޫނިއާ، ރެއާލް މެޑްރިޑް އެކަޑަމީގެ 16 އަހަރުން ދަށުގެ ޓީމާއެކު ފަރިތަކުރުންތަކެއް ކުރިއަށް ގެންގޮސްފިއެވެ. މިކަން ހާމަކޮށްފައިވަނީ ކުޅިވަރުގެ ހަބަރުތައް ގެނެސްދޭ މަޝްހޫރު ނޫހެއް ކަމަށްވާ 'ދަ އެތުލެޓިކް' އިންނެވެ.

ރޮނާލްޑޯ ޖޫނިއާ މިހާރު ކުޅެމުންދަނީ ސައުދީ އަރަބިއްޔާގެ އަލް-ނަސްރު ކްލަބަށެވެ. އޭނާ ވަނީ ދާދި ފަހުން ކްރޮއޭޝިއާގައި ބޭއްވި ބައިނަލްއަގުވާމީ މުބާރާތަކަށް ޕޯޗުގަލްގެ 15 އަހަރުން ދަށުގެ ގައުމީ ޓީމަށް ނަގާފައެވެ. އެ މުބާރާތުގެ ފައިނަލްގައި ކްރޮއޭޝިއާ ބަލިކޮށް ޕޯޗުގަލް މޮޅުވިއިރު، ރޮނާލްޑޯ ޖޫނިއާ ވަނީ ދެ ލަނޑު ކާމިޔާބުކޮށްދީފައެވެ.

Ad by Hajj Corporation

ރޮނާލްޑޯ ޖޫނިއާގެ ބައްޕަ، ކްރިސްޓިއާނޯ ރޮނާލްޑޯ ވަނީ 2009 އިން 2018 އަށް ރެއާލް މެޑްރިޑަށް ކުޅެދީފައެވެ. އެ މުއްދަތުގެ ތެރޭގައި އޭނާ ވަނީ އެ ކްލަބާއެކު ގިނަ ކާމިޔާބީތަކެއް ހޯދާފައެވެ. އޭގެ ތެރޭގައި ދެ ސްޕެނިޝް ލީގު، ދެ ކޮޕާ ޑެލް ރޭ، ހަތަރު ޗެމްޕިއަންސް ލީގު، ދެ ޔޫއެފާ ސުޕަ ކަޕް އަދި ދެ ސްޕެނިޝް ސުޕަ ކަޕް ހިމެނެއެވެ.

މިހާރުގެ ފޯމަށް ބަލާއިރު، 2025-2026 ވަނަ އަހަރުގެ ސީޒަނުގައި ރޮނާލްޑޯ ދަނީ މޮޅު ކުޅުމެއް ދައްކަމުންނެވެ. އޭނާ ވަނީ މިހާތަނަށް އެކި މުބާރާތްތަކުގައި ކުޅުނު 26 މެޗުން 22 ލަނޑު ޖަހައި، ހަތަރު އެސިސްޓް ހަދާފައެވެ.