ހައްދުންމަތީގައި ނުވަތަ ލ. އަތޮޅުގައި އާރްޓީއެލް ފެރީގެ ޚިދުމަތް ފަށައިފިއެވެ.

ރާއްޖޭގެ ރަށްތަކުގައި އާރްޓީއެލް ހައިސްޕީޑް ފެރީގެ ޚިދުމަތް ދެމުންދަނީ، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީއާ ޙަވާލުކޮށްގެންނެވެ. މިއީ ކުރީގެ ރައީސް އިބްރާހީމް މުހައްމަދު ޞާލިޙްގެ ސަރުކާރުން ފެށި މަޝްރޫއެކެވެ.

ރައްޔިތުންނަށް ބޭނުންތެރި މިފަދަ މަޝްރޫއުތައް ފުޅާކޮށް ކުރިއަށް ގެންދިއުމަށް އަދުގެ ސަރުކާރުން އަންނަނީ މަސައްކަތްކުރަމުންނެވެ. އެމްޓީސީސީން ބުނީ، މި ޚިދުމަތް ލ. އަތޮޅުގައި ފަށާފައި ވަނީ މިކަމަށްޓަކައި އެ އަތޮޅުގައި ބާއްވާ ޚާއްޞަ ރަސްމިއްޔާތެއްގައި ކަމަށެވެ.

Ad by Hajj Corporation

ލ. އަތޮޅުގައި ޚިދުމަތް ދިނުމަށް 2 ލޯންޗު ބޭނުން ކުރެއެވެ. އެއީ، 48 މީހުންގެ ޖާގައިގެ ޒަމާނީ ލޯންޗުތަކެކެވެ. މީގެ ތެރެއިން 4 ޖާގަ ޚާއްސަކޮށްފައިވަނީ، އެކި ކަހަލަ ނުކުޅެދުންތެރިކަން ހުންނަ ފަރާތްތަކަށެވެ. މި ލޯންޗުތަކަކީ، އިންޑިއާ ސަރުކާރުގެ އެހީގައި ބަނދެފައިވާ ލޯންޗުތަކެކެވެ. ހުކުރު ދުވަސް ފިޔަވާ ކޮންމެ ދުވަހަކުވެސް މި ޚިދުމަތް ލިބޭނެއެވެ.

އާރުޓީއެލް ފެރީގެ ޚިދުމަތަށް އާންމުން ހޭލުންތެރި ކުރުވުމުގެ ގޮތުން އެމްޓީސީސީން ވަނީ، ލ. ދަނބިދޫ އަދި މާބައިދޫގައި ޚާއްސަ ސެޝަންތަކެއް ބާޢްވާފައެވެ. މި ހިނގާ މާރިޗު މަސް ނިމުމުގެ ކުރިން ލ. އަތޮޅާއި މ. އަތޮޅުގައި އާރްޓީއެލްގެ ޚިދުމަތް ފެށުމަށް މަސައްކަތް ކުރަމުންދާ ކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން މިމަހުގެ ކުރީކޮޅު ވަނީ ވިދާޅުވެފައެވެ. އެންމެފަހުން ޚިދުމަތް ފަށާފައިވަނީ، ފ. އަދި ދ އަތޮޅުގައެެވެ.

އާރްޓީއެލް ޚިދުމަތް ކޮންމެ އަތޮޅެއްގައިވެސް ފަށަނީ، އެ އަތޮޅެއްގެ ރައްޔިތުން މި ޚިދުމަތަށް އަހުލުވެރި ކުރުމަށް އެއް ހަފުތާއަށް ހިލޭ ދަތުރު ކުރެވޭ ގޮތަށް ޚިދުމަތް ދިނުމަށް ފަހުއެވެ. އޭގެ ފަހުން އަތޮޅުގެ އެކި ރޫޓުތަކާއި އެހެން އަތޮޅުތައް ގުޅުވާލެވޭ ރޫޓުތަކުގައި ފީއެއް ނަގަން ފަށައެވެ.

މުޅި ރާއްޖެ ތިން ފިޔަވައްސަކަށް ބަހާލައިގެން ކުރިއަށްގެންދާ މި މަޝްރޫޢުގެ މައިގަނޑު މަޤްސަދަކީ ރައްޔިތުންނަށް ލުއިފަސޭހަކަމާއެކު، ހެޔޮ އަގެއްގައި ކަނޑުމަގުން ދަތުރު ކުރެވޭނެ ނިޒާމެއް ޤާއިމްކުރުމެވެ. އެގޮތުން މިހާތަނަށް 15 އަރޮޅެއްގައި މި ޚިދުމަތް ވަނީ ފަށާފައެވެ.

މިހާރު މި ޚިދުމަތް ނުފެށި ވަނީ، މ. އަތޮޅުގެ އިތުރުން ޒޯން 3 ގައި ހިމެނޭ ކ، އއ، އދ އަދި ވ. އަތޮޅުގައެވެ.