ކޮސޯވޯގެ މައްޗަށް 1-0 ގެ ނަތީޖާއަކުން ކުރިހޯދައި، 2002 ވަނަ އަހަރުގެ ފަހުން ފުރަތަމަ ފަހަރަށް ތުރުކީން ފީފާ ވޯލްޑް ކަޕުން ޖާގަ ހޯދައިފިއެވެ. ސްޓޭޑިއަމް ފަދިލް ވޮކްރީގައި ކުޅުނު މި މުހިންމު ކޮލިފިކޭޝަން ޕްލޭ-އޮފް ފައިނަލް މެޗުގައި ތުރުކީގެ ބަތަލަކަށްވީ ކެރެމް އަކްތުރްކޮގްލޫއެވެ.

މެޗުގެ ފުރަތަމަ ހާފުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ތުރުކީގެ ކެނާން ޔިލްޑިޒް އާއި ހަކާން ޗަނަނޮގްލޫ ވަނީ ނުރައްކާތެރި ހަމަލާތަކެއް އުފައްދާފައެވެ. ނަމަވެސް ފުރަތަމަ ހާފުގައި ލަނޑެއް ޖެހުމާ އެންމެ ގާތަށް ދިޔައީ ކޮސޯވޯއެވެ. އެގޮތުން ފިސްނިކް އަސްލާނީ ފޮނުވާލި ހަމަލާ ތުރުކީގެ ގޯލްކީޕަރު ވަނީ ހުޝިޔާރުކަމާއެކު ހުރަސްދަނޑީގައި ޖައްސާ ބޭރުކޮށްލާފައެވެ.

Ad by Hajj Corporation

ތުރުކީން މެޗުގެ ހަމައެކަނި ލަނޑު ކާމިޔާބުކުރީ ދެވަނަ ހާފު ފެށިގެން އަށްވަނަ މިނެޓުގައެވެ. އޯކުން ކޮކްޗޫ ފޮނުވާލި ހަމަލާއެއްގެ ބޭނުން ހިފައި، ކެރެމް އަކްތުރްކޮގްލޫ ވަނީ ބޯޅަ ގޯލުގެ ތިރީ ކަނަށް ފޮނުވާލައިގެން ތުރުކީއަށް ލީޑު ނަގައިދީފައެވެ. މި ލަނޑާއެކު ތުރުކީން ވޯލްޑް ކަޕަށް ކުރަމުންދިޔަ 24 އަހަރުވީ އިންތިޒާރަށް ވަނީ ނިމުން އައިސްފައެވެ.

މި މެޗުގައި ރެއާލް މެޑްރިޑްގެ އާާދާ ގުލާ އާއި ޔުވެންޓަސްގެ ޒުވާން ތަރި ޔިލްޑިޒްގެ ފަރާތުން މޮޅު ކުޅުމެއް ފެނިގެންދިޔައެވެ. ޔިލްޑިޒް ވަނީ މެޗުގައި އެންމެ ގިނަ ޑްރިބްލްތައް ފުރިހަމަކޮށް، އިދިކޮޅު އޭރިއާ ތެރޭގައި އެންމެ ގިނަ ފަހަރު ބޯޅައިގައި ޖެހި ކުޅުންތެރިޔާގެ މަގާމު ހޯދާފައެވެ. އަދި ގުލާ ވަނީ މުޅި މެޗުގައި ލަނޑު ޖަހާނެ އެންމެ ގިނަ ފުރުސަތު ތަނަވަސްކޮށްދީފައެވެ.

މެޗުގެ ފަހު ވަގުތުކޮޅު ކޮސޯވޯއިން ނަތީޖާ އެއްވަރުކުރުމަށް ބުރަ މަސައްކަތްތަކެއް ކުރިއެވެ. އެގޮތުން ފްލޮރެންޓް މުސްލިޖާއަށް ލިބުނު ފުރުސަތު ގޯލުގެ ދަނޑި ކައިރިން ބޭރަށް ދިޔައިރު، ތުރުކީން ވަނީ މެޗުގެ ނަތީޖާ ދަމަހައްޓައި އުތުރު އެމެރިކާގައި ބޭއްވުމަށް ހަމަޖެހިފައިވާ ވޯލްޑް ކަޕުން ޖާގަ ކަށަވަރުކޮށްފައެވެ.

ވޯލްޑް ކަޕްގައި ތުރުކީ ހިމެނިފައިވަނީ ގްރޫޕް 'ޑީ' ގައެވެ. މި ގްރޫޕްގައި ދެން ހިމެނެނީ އެމެރިކާ، ޕެރަގުއޭ އަދި އޮސްޓްރޭލިއާއެވެ. ތުރުކީން އެންމެ ފަހުން 2002 ވަނަ އަހަރު ވޯލްޑް ކަޕްގައި ވާދަކުރިއިރު، އެ މުބާރާތް އެ ޓީމުން ނިންމާލީ ތިންވަނަ މަގާމު ހޯދައިގެންނެވެ.