ޤައުމީ ލޯބީގައި ޤައުމަށް ހެޔޮއެދިގެން އުޅޭ އެއްވެސްމީހަކު ޤައުމަށް ދެރައެއް، ނިކަމެތިކަމެއް ލިބެން ނޭދޭނެކަމީ ޝައްކަތް އޮތްކަމެއްނޫނެވެ. އެފަދަ މީހަކު ޤައުމުގެ ސިޔާދަތަށް، މިނިވަންކަމަށް، ދީނަށް، ބަހަށް، އިޤްތިސާދަށް އަދި އިޖުތިމާއީ ތަރައްޤީއަށް ވީނަމަވެސް ނިކަމެތިކަމެއް ލިބިދާފަދަ ދެރައެއް ދޭކަށް ނޭދޭނެއެވެ.

ދިވެހިރާއްޖެ މިދެކޭ ހާލަތަކީ ޤައުމުދުށް ސަރުކާރުތަކުން މަތިމައްޗަށް ނަގާފައިވާ ލޯނުތައް އަދު އޮތް ސަރުކާރަށް ދައްކާންޖެހުނު ހާލަތެކެވެ. ބިލިއަނުން ފައިސާ ޗާޕުކޮށް ފޭބިވެރީން ވާރުތަކޮށްދިން މާލީ ދަންތުރައިން ޤައުމު ސަލާމަތްކުރާންޖެހިފައި އޮތް ހާލަތެވެ. މި ހާލަތުން ޤައުމު ސަލާމަތްކުރުމަށް އަދުގެ މާލިމީއާއި ސަރުކާރުން ކުރާ މަސައްކަތަށް ހުރަސްއަޅައި، ޤައުމަށް ފައިސާއެއް، ނަފާއެއް ލިބިދާނެ ދޮރުތައް ބަންދުކުރާން ގޮވާލާ މީހުންނަށް ކިޔާން އެންމެ ރަނގަޅުނަމަކީ ޣައްދާރުންނޫން ދެން ކޮންމަކެއްހެއްޔެވެ؟

ޤައުމު މިހާލަތުން ވީއްލުނަނުދީ، ސަރުކާރު ނާކާމިޔާބުކޮށްލައި، އަވަހަށް ވެރިކަމަށް ސަވާރުވުމުގެ ހުފަންދެކޭ ބޮޑުންނާއި، އެމީހުންނަށް ވާގިވެރިވާ ބައިވެރިން ޤައުމު ވެއްޓިފައި އޮތް މާލީ އަނދަވަޅުން އެރިޔަނުދީ، ޤައުމު އެ އަނދަވަޅަށް ގަންބާލަން ރެޔާދުވާލު ކުރާ މަސައްކަތްތަކަކީ އެބައިމީހުން ޤައުމީ ވާހަކަދައްކައި، މާޤައުމުދެކެ ލޯވިގެންއުޅޭކަމަށް ހެދިގެން ރައްޔިތުން ވާވައްދަންކުރާ މަސައްކަތެއްކަން މިއަދު އެނގިހާމަވަނީ އެބައިމީހުންގެ މިހާރާއި އެހާރުގެ ޢަމަލުތަކަށް ވިސްނުން ހިންގައިލުމުންނެވެ.

ޓޫރިޒަމް ބޮއިކްޓްކުރަން ގޮވިގޮވުން

ވެރިކަން ގެއްލޭކޮންމެ ފަހަރަކު މިދެންނެވި މީހުން އިސްކުރާ އެއްކަމަކީ އުފެދިފައި އޮންނަ ސަރުކާރަކަށް މާލީ ދަތިތައްކުރިމަތިވާނެ މަގުތަށް ކޮށުމެވެ. ބޭނުމަކީ ސަރުކާރު ފެއިލް ކޮށްލުމެވެ. އޭގެ އެއް މިސާލަކީ ''ޓޫރިޒަމް ބޮއިކަޓް'' ކުރަން ގޮވާފައި ގޮވުމެވެ. ރާއްޖެއަށް އަންނަ ފަތުރުވެރިން އަޔަނުދިނުމަށް އަމިއްލަ ފަސްގަނޑާ އިދިކޮޅަށް ކެމްޕޭން ކުރުމެވެ. އެބައި މީހުން މިކަން ތަކުރާރުކޮށް ހިންގާފައިވެއެވެ. ޤައުމު ރައްޔިތުންނަށް ލޯތްބެއް އޮތް ނަމަ ޤައުމުގެ އިގްތިސާދީ އެންމެ ބޮޑު ސިނާއަތަށް ވިހަލާން އެވެރިން ނޫޅުނީހެވެ. ޤައުމަށް ފަތުރުވެރިން ނައުމަށް ގޮވާލިއިރު މިއީ ތިމާމެންނާއި، ތިމާމެންގެ ޢާއިލާތަކާއި ވެސް ގުޅިފައިވާ މަސްލަހަތެއްކަން ހަނދާންނެތިކޮށްލީ އުތުރުއެރި އެއުރެންގެ އަމިއްލަ އެދުމެވެ. ޤައުމަށް އަރާ މާލީ ކޮންމެ ލޮޅުމެއް މިފަސްގަނޑުގެ ކޮންމެ އަހުލުވެރިއަކު ވެސް ތަހައްމަލުކުރަންޖެހެއެވެ.

އިންވެސްޓަރުން ފަސްޖެއްސުމަށް މަސައްކަތްކުރުން

ރާއްޖޭގެ ފަތުރުވެރިކަމުގެ ސިނާއަތާއި އަދި މިނޫންވެސް ނަފާވެރިކަން ހޯދިދާނެ ދާއިރާތަކަށް ޝައުޤުވެރިވާ އިންވެސްޓަރުން ޖެހިލުންކުރުވައި، ބައިނަލްއަޤްވާމީ މާލީ އިދާރާތަކުގެ ކުރިމަތީގައި ޤައުމުގެ ނަން ކިލަނބުކޮށް، ޤައުމުގެ ތަރައްޤީއާއި ތަމައްދުންއަށް ހުރަސްއަޅަން އެވެރިން ތަކުރާރުކޮށް މަސައްކަތްކޮށްފައިވެއެވެ. ވެރިކަމުގައި ނެތިވާ ކޮންމެ ފަހަރަކު މިކަމުގައި މަސްއޫލުވެ އެވެރިން އުޅެތެވެ.

އަށެއް ފެބުރުއަރީގެ ބޮޑުހުޅު

ސިޔާސީ ޖަޒުބާތުގައި ވިޔަސް ޤައުމަށް ހެޔޮއެދޭނަމަ އިންތަކެއް ވެއެވެ. އެ އިންތަކުން ބޭރުވެ، ދައުލަތާއި ސަރުކާރުގެ އިމާރާތްތަކާއި، މުދަލުގައި ހުޅުޖަހައި ދައުލަތަށް އެތައް މިލިއަނުންގެއްލުންދިން ބަޔަކަށް ޤައުމަށް ހެޔޮއެދެވޭނެ މިންވަރު ވަޒަންކޮށްލަމާ ހިންގަވާށެވެ. 8 ފެބްރުއަރީ 2012 ވަނަ ދުވަހު އެބައި މީހުން ރޯކޮށް އަންދާ ހުލިކޮށްލީ ރައްޔިތުންގެ އެތައް މިލިއަން ފައިސާއެވެ. އެދުވަހު އަމިއްލަ ފަރުދުންގެ މިންނެތް މަސައްކަތުން އާރާސްތުކުރަމުން ދިޔަ ދިރިއުޅުމުގައި ވެސް ހުޅުޖަހައި އަންދާލީއެވެ.

ފެނުނީ ޤައުމީ ލޯތްބެއްނޫން، އަމިއްލަ އެދުން

މިހާރުގެ ހާލަތުން މި ސަރުކާރުން އަރައިގަންނަން ކުރާ މަސައްކަތަށް ދުއްތުރާކުރިމަތިކޮށް، އަވަށްޓެރީންނާއި އަތާއިއަތް ގުޅުވާލަން ކުރާ މަސައްކަތުގައި ކަތުރުފަނި އަޅުވަން އެކިރާގުތައް ކިޔައި ހަދާއިރު، ޤައުމު މި މާލީ އަނދަވަޅުން އަރައިނުގަނެވިއްޖެނަމަ އޭގެ ގެއްލުން ތިމާމެންގެ ދަރީންނާއި ދަރީންގެ ދަރިފަސްކޮޅަށް ފޯރަނާނެކަން އިނގެތިބެ އެ ޢަމަލުތައް ކުރުމުން ދިޔުމަށް ކިޔޭނީ އަމިއްލަ އެދުންނޫން ދެން ކޮންއެއްޗެއްހެއްޔެވެ؟ ހުދު ތިމާމެންގެ ސަބަބުން ޤައުމު ދަރައި، މާލީ އަނދަވަޅެއްގައި އޮތްއިރު، އެ ހާލަތުން އަރައިގަންނަން އަދުގެ ވެރީން ކުރާ މަސައްކަތް އެހެން މީޒާނަކަށް އަނބުރައިލައި، ރައްޔިތުންނަށް އޮޅުވާލާން މަސައްކަތްކުރާ މީހުންނަކީ ވެސް ހަމަ ޙަޤީޤީ ޤައުމުދެކެ ލޯބިވާ ބަޔެއްހެއްޔެވެ؟

މޮޅެއްވީމާ އެންމެނަށް ވެސް މޮޅު

އެ ދަތިކުރުންތަކާއި، އެ އޮޅުވާލުންތަކާއި، އެ ގޮވެލިފަތީގެ މެދުން ހަށިފޮޅާލައިނުކުމެ އެބައިމީހުން ކެހި ކަނޑުލުގެ ހިތިފިލުވާން އަދުގެ ވެރީން ކުރާ މަސައްކަތުގެ ހެޔޮ ނަތީޖާ އަތްފޯރާ ފަށަށް ތިލަވެފައިވާއިރު، ޤައުމަށް ލިބޭ މާލީ ހަމަޖެހުމާއި، މާލީ އިދާރާތަކާއި، އިންވެސްޓަރުންގެ އިތުބާރު ދެމެހެއްޓޭނެ މަގުއަލިވެ ދިޔުމުން މޮޅުވަނީ ހަމައެކަނި އަދުގެ ވެރީންނަކަށް ނުވަތަ ވަކި ފިކުރަކަށްނޫނެވެ. އެ މޮޅާއި، އެ ހިތްހަމަޖެހުން މުޅިޤައުމަށް، މުޅިރަށްޔިތަށް ލިބެގެންދާކަން ކަށަވަރެވެ.

ބުހުތާނުގެ އަހުލުވެރިންކަން ދެނެތިބުން

އެވެރިންގެ ޤައުމީ ލޯތްބެއް ނެތްކަން ސާފުވާހިނދު، އެ އުރެންގެ ފިތުނައިން ރައްކާތެރިވެ ތިބުމަށް އެންމެހާ ރައްޔިތުން ވެސް ވިސްނުން އިސްކުރަންޖެހެއެވެ. އެ ފިކުރުގެ ތެރޭ ތިބި އެންމެނަކީ އޭގެ ބައިވެރިންކަމުގައި ނުވާތީ، އެވެރިންގެ ވެރިންގެ މި މުނާފިގުކަމަށް ވިސްނައި ދެވަނަ ވިސްނުމެއް އިސްކުރާންޖެހެއެވެ. ދެރަވީމަ ދެރަ އެންމެނަށެވެ. މޮޅުވީމަ މޮޅު ވެސް އެންމެނަށެވެ. ހިފާންވީ ހިކުމަތްތެރި، މުރާލި، ވިސްނުންތެރި މާލިމީ އެއްލާފައިވާ ވަލުގެ ކޮޅުގައެވެ. އެއްބާރުލުން ދޭންވީ އަދުގެ މާލިމީއަށެވެ. އެ މާލިމީގެ ކޮލިޓީއާއި، ދުރުވިސްނުން ހަމަލޮލަށް ފެންނަންހުރިއިރު، އެއްބާރުލުން ދިނުމަށް ފަސްޖެހި ބުހުތާނުގައި ޖެހި ތިބެވިއްޖެނަމަ އެ ދެރަ ދެވުނީ މުޅި ހަޔާތަށެވެ.