ފާއިތުވި ހަފުތާއެއްގެ ތެރޭގައި މާލެ، ސިނަމާލެ ބްރިޖާއި ހައިވޭގައި 50 އަށްވުރެ ގިނަ އެކްސިޑެންޓު ހިނގާފައިވާ ކަމަށް ފުލުހުންގެ ތަފާސްހިސާބުން ދައްކައިފިއެވެ.

ފުލުހުން އާންމުކޮށްފައިވާ ތަފާސްހިސާބުން ދައްކާގޮތުގައި މާރޗު 22 އިން 28 ގެ ނިޔަލަށް މާލެއާއި ސިނަމާލެ ބުރިޖު އަދި ހައިވޭގައި ޖުމްލަ 56 އެކްސިޑެންޓް ހިނގާފައިވެއެވެ. އަދި މީގެތެރެއިން އެންމެ ގިނަ އެކްސިޑެންޓު ހިނގާފައިވަނީ މާލޭގައި ކަމަށް ވެސް ދައްކައެވެ. މާލޭ ސަރަހައްދުގައި ހިނގި 56 އެކްސިޑެންޓުގެ ތެރެއިން، 49 އެކްސިޑެންޓަކީ މާލެތެރެއިން ރިޕޯޓުކޮށްފައިވާ މައްސަލަތަކެއްކަމަށް ވެސް ވަނީ ދައްކާފައެވެ.

Ad by Hajj Corporation

މި މުއްދަތުގެ ތެރޭގައި އެންމެ ގިނަ އެކްސިޑެންޓުތައް ހިނގީ މާރިޗު 25 ވަނަ ދުވަހުއެވެ. އެދުވަހު 13 އެކްސިޑެންޓް ހިނގާފައިވާ ކަމަށް ފުލުހުންގެ ތަފާސްހިސާބުން ދައްކައެވެ. ފުލުހުން ބުނީ މީގެތެރެއިން 14 އެކްސިޑެންޓެއް ހިނގީ ދެ ސައިކަލު ޖެހިގެންކަމަށާއި ސައިކަލާއި ކާރު ޖެހިގެން 14 އެކްސިޑެންޓެއް ހިނގި ކަމަށެވެ. އަދި އެކްސިޑެންޓުވުމުން މަޑުނުކޮށް ދިޔަ 7 މައްސަލައެއް ރިޕޯޓު ކުރެވިފައިވާ ކަމަށް ވެސް ބުނެއެވެ.

ގިނަ އެކްސިޑެންޓްތައް ހިނގާފައިވަނީ ދުވާލުގެ ވަގުތުގައިކަން ފާހަގަކުރެވިފައިވާއިރު، މިދިޔަ އަހަރު މާލެ ސަރަހައްދުގައި 2000 އަށްވުރެ ގިނަ އެކްސިޑެންޓު ހިނގާފަވެއެވެ. މީގެތެރެއިން 300 އަށްވުރެ އެކްސިޑެންޓު ހިނގީ ބްރިޖާއި ހައިވޭގައެވެ.

މަގުމަތީގެ ސަލާމާތާއި ރައްކާތެރިކަން ކަށަވަރުކުރުމުގައި އެންމެން އެކުގައި މަސައްކަތްކުރުމަށް ފުލުހުން ވަނީ އެދިފައެވެ. އުޅަނދު ދުއްވުމުގައި މަގުމަތީގެ ޤަވައިދުތަކަށް ސަމާލުވުމާއި އުޅަނދުތައް ދުއްވާ މީހުންނެކޭ އެއްގޮތަށް ހިނގާ މީހުންވެސް އެކަންކަން ސަމާލުވުމަށް ފުލުުހުން އިލްތިމާސްކުރެއެވެ.