ދެ ނަމާދު ދޭތެރޭގައި ޤުރުއާން ކިޔެވުމުގެ އާދާކާދަ ދިރުވައި އާލާކުރަން ޖެހޭ ކަމަށް މާލެ ސިޓީ ކައުންސިލްގެ މޭޔާރު އާދަމް އާޒިމް ވިދާޅުވެއްޖެ އެވެ.

މޭޔަރު މިހެން ވިދާޅުވެފައިވަނީ، މާލެ ސިޓީ ކައުންސިލުން އިންތިޒާމް ކޮށްގެން ކޮންމެ އަހަރަކު ވެސް ބައްވާ ޤުރުއާން އަދި މަދަހަ މުބާރާތުގެ ނަތީޖާ ފާޅުކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

Ad by Hajj Corporation

މޭޔަރު ވިދާޅުވީ،ި މި ފަދަ މުބާރާތްތައް ބާއްވަނީ ހަމައެކަނި މާލެ ސޓީ ކައުންސިލުގެ މެންޑޭޓްގެ ތެރޭގައި މި ފަދަ މުބާރާތްތައް ބޭއްވުން ހިމެނޭތީއެއް ނޫންކަމަށެވެ. އަދި މި މުބާރާތްތައް ބާއްވަނީ، އިސްލާމްދީީނަށް ލޯބިކުރާ ޖީލެއް ބިނާ ކުރުމަށް ކަމަށް މޭޔަރު ވިދާޅުވިއެވެ.

ގަދީމީ ޒަމާނުއްސުރު ދިވެހިންގެ ތެރޭގައި އޮތް، ދެ ނަމާދު ދޭތެރޭގައި ޤުރުއާން ކިޔެވުމުގެ އާދާކާދައަކީ، ދިރުވައި އާލާކޮށް ދަމަހައްޓަން ޖެހޭ އާދަކާދައެއް ކަމަށް ވެސް މޭޔަރު ވިދާޅުވިއެވެ. އެހެން ކަމުން ކުރީ ޒަމާނެއެކޭ އެއް ގޮތަށް، ކީތިރީ ގުރުއާނުގެ މޫރިތި އަޑުން، މި ސައްތައިން ސައްތަ މުސްލިމް މުޖުތަމުޢަށް ދިރުން ގެނައުމަށް ޓަކައި، ދެ ނަމާދު ދޭތެރޭގައި ގުރުއާން ކިޔެވުމުގެ އާދަކާދާ ދިރުވައި އާލާކުރުމަށް މޭޔަރު އިލްތިމާސްކުރައްވާފައި ވެއެވެ.