އީއެފްއެލް ކަޕް ފައިނަލުން ބަލިވިތާ ކުޑަދުވަސްކޮޅެއްގެ ތެރޭގައި، އެފްއޭ ކަޕްގެ ކުއާޓާ ފައިނަލުގައި ސައުތެމްޕްޓަން އަތުން 2-1 އިން ބަލިވެ އާސެނަލް މުބާރާތުން ކަޓައިފިއެވެ. ސެއިންޓް މޭރީޒްގައި ކުޅުނު މި މެޗުގައި ސައުތެމްޕްޓަން މޮޅުކޮށްދިން ލަނޑު ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޝީ ޗާލްސްއެވެ.

މެޗުގެ ފުރަތަމަ ހާފުގައި ރޮސް ސްޓެވާޓް ޖަހައިދިން ލަނޑާއެކު ޗެމްޕިއަންޝިޕްގެ ސައުތެމްޕްޓަނުން ލީޑު ނެގިއެވެ. ނަމަވެސް މެޗުގެ 68 ވަނަ މިނެޓުގައި އާސެނަލްގެ ވިކްޓަރ ގިއޮކެރެސް ވަނީ ލަނޑެއް ޖަހައި މެޗުގެ ނަތީޖާ ހަމަހަމަކޮށްފައެވެ. އާސެނަލްއިން މެޗުގެ ނަތީޖާ ހަމަހަމަކުރި ނަމަވެސް، އެ ޓީމުގެ ޑިފެންޑަރު ގަބްރިއެލް މަގަލްހައެސްއަށް ލިބުނު އަނިޔާއަކާ ގުޅިގެން ބަދަލުކުރަން ޖެހުމުން ދިފާއީ ރޭވުންތަކަށް ބުރޫއެރިއެވެ.

Ad by Hajj Corporation

މެޗު ނިމެން ފަސް މިނެޓަށް ވެފައި ވަނިކޮށް ޝީ ޗާލްސް ވަނީ ސައުތެމްޕްޓަންގެ ދެވަނަ ލަނޑު ޖަހައި އާސެނަލް ސިއްސުވާލާފައެވެ. މި ނަތީޖާއާއެކު، މި ސީޒަނުގައި ތިން ތަށި ހޯދުމަށް އާސެނަލް ކުރަމުންދިޔަ އުންމީދުތަކަށް ވަނީ ހުރަސް އެޅިފައެވެ. މީގެ ދެ ހަފްތާ ކުރިން ހަތަރު ތަށި ހޯދުމުގެ ފުރުސަތު އޮތް އާސެނަލްއަށް މިހާރު ބާކީ އޮތީ ހަމައެކަނި ޕްރިމިއާ ލީގާއި ޗެމްޕިއަންސް ލީގެވެ.

މި މެޗުގައި އާސެނަލްގެ ކެޕްޓަން މާޓިން އޮޑެގާޑާއި މާޓިނެލީއަށް ލަނޑު ޖަހާނެ ރަނގަޅު ފުރުސަތުތަކެއް ލިބުނު ނަމަވެސް، ސައުތެމްޕްޓަންގެ ގޯލްކީޕަރު ޑެނިއަލް ޕެރޭޒް ވަނީ މޮޅު ސޭވްތަކެއް ކޮށްފައެވެ. ތަފާސްހިސާބުތަކަށް ބަލާއިރު އާސެނަލްއިން 23 ހަމަލާ އުފެއްދިއިރު، ސައުތެމްޕްޓަނަށް އުފެއްދިފައިވަނީ އެންމެ 8 ހަމަލާއެވެ. ނަމަވެސް އާސެނަލްގެ ދިފާއީ ގޯސްތަކުގެ ފައިދާ ސައުތެމްޕްޓަނުން ވަނީ ވަރަށް ފުރިހަމައަށް ހިފާފައެވެ.

މިއީ ސައުތެމްޕްޓަނުން މި މުބާރާތުގައި ޕްރިމިއާ ލީގުގެ ޓީމެއް ބަލިކުރި ދެވަނަ ފަހަރެވެ. މީގެ ކުރިން އެ ޓީމުން ވަނީ ފުލަމް ވެސް މުބާރާތުން ބޭރުކޮށްފައެވެ. އާސެނަލްއަށް މި ނާކާމިޔާބީއާ ކުރިމަތިލާން ޖެހުނީ އެންމެ ފަހުން ކުޅުނު އެފްއޭ ކަޕްގެ 16 ކުއާޓާ ފައިނަލުގެ ތެރެއިން 14 މެޗުން މޮޅުވެފައިވާ ރެކޯޑަކާއެކު ކުރިމަތިލި ނަމަވެސްނެވެ.