ޢުމްރާގެ މަތިވެރި އަޅުކަން އަދާކުރެއްވުމަށް ޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު، ސަޢޫދީޢަރަބިއްޔާއަށް ފުރާވަޑައިގެންފި އެވެ.

ރައީސުލްޖުމްހޫރިއްޔާގެ އޮފީހުން މަޢުލޫމާތު ދެއްވާފައިވާ ގޮތުގައި، ރައީސްގެ ދެ ކަނބަލުން ކުރައްވާ މި ދަތުރުފުޅަކީ ސަޢޫދީ ޢަރަބިއްޔާގެ ސަރުކާރުގެ ފުރިހަމަ މެހުމާންދާރީގައި ކުރައްވާ ދަތުރުފުޅެކެވެ. މި ދަތުރުފުޅުގެ ހުރިހާ ޚަރަދެއް ހަމަޖައްސަވައިދެއްވަނީ ސަޢޫދީ ސަރުކާރުންނެވެ. އަދި މި ދަތުރުފުޅާ ގުޅޭ އެންމެހައި އިންތިޒާމްތަކެއް މިދިޔަ ފެބުރުވަރީ މަހުގެ ކުރީކޮޅު ހަމަޖައްސަވާފައިވާކަމަށް ރައީސް އޮފީހުން ވަނީ ބުނެފަ އެވެ.

Ad by Hajj Corporation

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޒަޢާމަތުގައި ދިވެހިރާއްޖެއާއި ސަޢޫދީ ޢަރަބިއްޔާއާ ދެމެދު އޮތް ޒަމާންވީ އަޚުވަންތަ ގުޅުން ވަނީ އިތުރަށް ހަރުދަނާވެ، އައު އުސްމިންތަކަކަށް ގޮސްފައެވެ. ޚާއްޞަކޮށް އިސްލާމީ ކަންކަމާއި، ޙައްޖާއި ޢުމްރާގެ މަތިވެރި އަޅުކަމާ ގުޅޭ ކަންކަމުގައި ސަޢޫދީ ސަރުކާރުން އަންނަނީ ދިވެހިރާއްޖެއަށް ބޮޑެތި އެހީތެރިކަން ފޯރުކޮށްދެމުންނެވެ.

ފާހަގަކުރެވޭގޮތުގައި 2024 ވަނަ އަހަރުވެސް ރައީސްގެ ދެކަނބަލުން ވަނީ، މާތްވެގެންވާ ދެ ހަރަމްފުޅުގެ ހާދިމް އަދި ސައުދީ އަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒުގެ ހާއްސަ މެހެމާން ދާރީގައި ކުރައްވާ ޢުމްރާ ދަތުރުފުޅެއްގައި އެ ގައުމަށް ވަޑައިގެންފައެވެ. 

ދިވެހިރާއްޖެއާއި ސަޢޫދީ ޢަރަބިއްޔާއާ ދެމެދު ރަސްމީކޮށް ސިޔާސީ ގުޅުން ޤާއިމުކޮށްފައިވަނީ 17 މާރޗް 1981 ގައެވެ. އޭގެ ފަހުން ފާއިތުވި 43 އަހަރު ދުވަހުގެ ތެރޭގައި ދެ ޤައުމުގެ ދެމެދުގައި ވަނީ ވަރުގަދަ ގުޅުމެއް އުފެދިފައެވެ.

ރައީސްގެ މި ދަތުރުފުޅަކީ ދެ ޤައުމުގެ ދެމެދުގައި އޮތް ގާތް ގުޅުން ރަމްޒުކޮށްދޭ މުހިންމު ދަތުރުފުޅެކެވެ.