އޭޕްރީލް 8 ވަނަ ދުވަހުގެ ހެނދުނު އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލުން ނެރުނު ބަޔާނެއްގައި، "ބްރިޖް ޑޭ" ގެ ނަމުން ނަންދެވިފައިވާ ބޮޑު ކާރިސާ މިވަގުތަށް ހުއްޓުވިފައިވާކަން ކަށަވަރުކޮށްދީ, ދެ ހަފުތާގެ މުއްދަތަށް ހަނގުރާމަ މެދުކަނޑާލަން އެމެރިކާ އާއިއެކު ރަސްމީކޮށް އެއްބަސްވުމަކަށް އާދެވިފައިވާކަން ޢިއުލާންކޮށްފިއެވެ.

މި އެއްބަސްވުމަކީ އެމެރިކާގެ ރައީސް ޑޮނަލްޑް ޓްރަމްޕް ދެއްވި ސުންގަޑި ހަމަވާން އެންމެ ދެ ގަޑިއިރަށް ވެފައި ވަނިކޮށް، ޕާކިސްތާނުން މެދުވެރިއެއްގެ ދައުރު އަދާކޮށްގެން ހޯދި ބޮޑު ޑިޕްލޮމެޓިކް ކާމިޔާބީއެކެވެ.

Ad by Hajj Corporation

ދެ ގައުމުގެ ދެމެދުގައި ވެވުނު އެއްބަސްވުމުގެ ދަށުން ކުރިއަށް އޮތް 14 ދުވަހުގެ މުއްދަތަށް ހަނގުރާމައިގެ އަމަލުތައް ވަގުތީ ގޮތުން ހުއްޓާލުމަށް ވަނީ ނިންމާފައެވެ. މި އެއްބަސްވުމުގެ ދަށުން އީރާނުން ވަނީ ހޯރްމޫޒް ކަނޑުއޮޅި ފުރިހަމައަށް އަދި ރައްކާތެރިކަމާއެކު ވަގުތުން ހުޅުވާލުމަށް އިލްތިޒާމްވެފައެވެ. އީރާނުގެ ޚާރިޖީ ވަޒީރު އައްބާސް އަރާގްޗީ ވިދާޅުވި ގޮތުގައި، މި މުއްދަތުގައި އީރާނުގެ އަސްކަރިއްޔާއާ ގުޅިގެން ރައްކާތެރިކަމާއެކު ދަތުރުފަތުރު ކުރުމުގެ ފުރުސަތު އޮންނާނެއެވެ.

އެމެރިކާގެ ރައީސް ޓްރަމްޕް 'ޓްރޫތު ސޯޝަލް' މެދުވެރިކޮށް ވިދާޅުވީ، އީރާނުގެ އުމްރާނީ ވަސީލަތްތަކަށް ދޭން ރާވާފައިވާ "ބްރިޖް ޑޭ" އަދި "ޕަވަރ ޕްލާންޓް ޑޭ" ހަމަލާތައް މި މުއްދަތަށް މެދުކަނޑާލާނެ ކަމަށެވެ. މީގެ އިތުރުން، އަންނަ ހުކުރު ދުވަހު ޕާކިސްތާނުގެ އިސްލާމްއާބާދުގައި މަތީ ފަންތީގެ މަޝްވަރާތައް ފެށުމަށް ވަނީ ހަމަޖެހިފައެވެ. މި މަޝްވަރާތައް ބިނާވާނީ އީރާނުގެ 10 ނުކުތާގެ ޕްލޭނާއި އެމެރިކާގެ 15 ނުކުތާގެ "ވިޓްކޮފް ޕްރޮޕޯސަލް" ގެ މައްޗަށެވެ.

ހަނގުރާމަ މެދުކަނޑާލުމުގެ އެއްބަސްވުން އިޢުލާނު ކުރުމުގެ ކުޑަވަގުތުކޮޅެއް ކުރިން، ސަރަހައްދުގައި ވަނީ ވަރުގަދަ ހަމަލާތަކެއް ބަދަލުކޮށްފައެވެ. އިސްރާއީލުން ވަނީ އީރާނުގެ ކާޝާން އަދި ޝީރާޒްގައި ހުރި ރޭލު ބްރިޖްތަކަށާއި ޕެޓްރޯކެމިކަލް ކާރުޚާނާތަކަށް ފުޅާދާއިރާއެއްގައި ހަމަލާދީފައެވެ. ހަމައެހެންމެ، އެމެރިކާއިން ވެސް ވަނީ ޚާރްގް އައިލެންޑްގެ 50 އަމާޒަކަށް ހަމަލާދީފައިވާ ކަމަށް ރިޕޯޓްތައް ބުނެއެވެ.

މި އެއްބަސްވުމާއެކު، އެމެރިކާގެ "އޮޕަރޭޝަން އެޕިކް ފިއުރީ" ގެ ދަށުން ހަމަލާ ދިނުމަށް ތައްޔާރުވެފައިވާ ހުރިހާ ފައުޖުތަކެއް މިހާރު ވަނީ "ސްޓޭންޑްބައި" ހާލަތަށް ބަދަލުކޮށްފައެވެ. އީރާނުގެ ވައިގެ ސަރަހައްދާ ދިމާލަށް ދަތުރުކުރަމުންދިޔަ ބީ-52 ބޮންއަޅާ ބޯޓުތައް ވެސް މިހާރު ވަނީ ޑިއޭގޯ ގާސިއާ އަދި އެމެރިކާގައި ހުންނަ އެމީހުންގެ މަރުކަޒުތަކަށް އެނބުރި ގޮސްފައެވެ.

ޕާކިސްތާނުގެ ބޮޑުވަޒީރު ޝެހްބާޒް ޝަރީފް މެދުވެރިވެވަޑައިގެން ހޯއްދަވައިދެއްވި މި ފުރުސަތަކީ، މުޅި ސަރަހައްދު ބޮޑު ހަނގުރާމައެއްގެ ތެރެއަށް ވެއްޓެން ދަނިކޮށް ލިބުނު ވަގުތީ ނަމަވެސް މުހިންމު ލުޔެކެވެ.