އޮސްޓްރިއާގެ އެނާޖީ ޑްރިންކް، ރެޑްބުލްގެ ފުޓްބޯޅައިގެ އޮޕަރޭޝަނުގެ އިސްވެރިއަކަށް ލިވާޕޫލުގެ ކުރީގެ ކޯޗު، ޔާގެން ކްލޮޕް ހަމަޖައްސައިފިއެވެ.

ކްލޮޕް ހަމަޖައްސައިފައިވަނީ ރެޑްބުލް އިން ހިންގާ ފުޓްބޯޅަ ކްލަބްތަކުގެ ކަންކަން ބަލަހައްޓައި، އެ ކަންކަން ކުރިއެރުވުމަށް ބޭނުންވާ ފަންނީ ލަފާ ދިނުމުގެ އިސް މަގާމު ކަމުގައިވާ "ހެޑް އޮފް ގްލޯބަލް ސޮކާ"ގެ މަގާމަށެވެ.

އެގޮތުން އޭނާގެ ޒިންމާއަކަށް ވާނީ ރެޑްބުލްގެ ކްލަބްތަކުގެ ކޯޗުނާއި މެނޭޖްމަންޓަށް ލަފާދީ، ރަނގަޅު ކުރަން ޖެހޭ ކަންކަމަށް މަގުދައްކައިދިނުމެވެ.

ރެޑް ބުލް އަކީ ގިނަ ގައުމުތަކުގައި އެ ކުންފުނީގެ ކްލަބްތައް ހިންގާ ކުންފުންޏެކެވެ. އެގޮތުން ޖަރުމަނުގެ އާރްބީ ލީޕްޒިގާއި، އޮސްޓްރިއާގެ އާރްބީ ސަލްޒްބާގާއި، އެމެރިކާގެ ނިއުޔޯކް ރެޑްބުލްސް އަދި ބްރެޒިލްގެ ރެޑްބުލް ބްރާގަންޓީނޯ އަކީ އެކުންފުނީގެ ދަށުން ހިންގާ ކްލަބުތަކެވެ.

ފުޓްބޯޅައިގެ ކޯޗިންގެ ދާއިރާއިން މަޝްހޫރުވި ތަޖުރިބާކާރު ކޯޗު ކްލޮޕް ވަނީ ޖަރުމަނުގެ ޑޯޓްމަންޑް އަދި އިނގިރޭސި ކްލަބް ލިވަޕޫލްއަށް ގިނަ ދުވަހު ކޯޗުކަން ކޮށްދީފައެވެ. އެގޮތުން އޭނާ ވަނީ ލިވާޕޫލުގައި 9 އަހަރު ހޭދަކޮށް، ޔޫރަޕުގައި އަދި ކުލަބު ކެރިއަރުގައި އެ ޓީމަށް ލިބޭނެ ހުރިހާ ތައްޓެއް ހޯދައިދީފައެވެ.