އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ ޙިޔާނާތުގެ މައްސަލާގައި ދައުލަތުން ބައްސާމް ގެ މައްޗަށް ކުރާ ދައުވާ އިސްތިއުނާފް ކުރުމަށް އެދި ހުށައަޅައިފިއެވެ. ބައްސާމް ގެ ފަރާތުން މި މައްސަލަ އިސްތިއުނާފު ކުރުމަށް ހުށައެޅީ މިއަދުއެވެ.

ބައްސާމް ގެ މައްޗަށް ދައުލަތުން ދައުވާ ކޮށްފައިވަނީ ކޮވިޑު19ގެ ތެރޭގައި ރާއްޖޭގެ ކްލަބްތަކަށް އެހީވާން ފީފާ އިން ދޫކުރި ފައިސާ އިން ބައްސާމް، އަމީން އެވެނިއު އިން އެޕާޓްމެންޓް ގަތްކަމަށް ތުހުމަތުކުރެވޭ މައްސަލައެއްގައެވެ، މި މައްސަލައިގައި ބައްސާމާ އެކު އަމިން އެވެނިއުގެ ވެރިފަރާތް ކަމަށްވާ އަމިން ކޮންސްޓްރަކްޝަން އާއި، އެފްއޭއެމްގެ ކުރީގެ ފައިނޭންސް ހެޑް މުހައްމަދު އަގީލް އަދި އެފްއޭއެމްގައި ކުރިން އިސްކޮށް އުޅުނު ހަސަން ވަހީދުގެ މައްޗަށް ވެސް ދައުވާކުރަން ފުލުހުން ވަނީ ޕީޖީ އޮފީހަށް ފޮނުވާފަ އެވެ.

ޕީޖީ އޮފީހުން ބުނެފައިވާ ގޮތުގައި، 2018 ވަނަ އަހަރުގެ ޖަނަވަރީ މަހުން ފެށިގެން 2023 ވަނަ އަހަރުގެ އޮކްޓޫބަރު މަހާ ހަމައަށް ގާތްގަނޑަކަށް 12.4 މިލިއަން ޑޮލަރު ފީފާއިން އެފްއޭއެމްއަށް އެހީގެ ގޮތުގައި ދީފައިވެއެވެ. އެއީ ދިވެހި ރުފިޔާއިން ނަމަ 191،208،000.00 އެވެ. ފީފާއިންނާއި ބޭރުގެ ފުޓްބޯލް އެސޯސިއޭޝަންތަކުން އެފްއޭއެމަށް ފައިސާ ޖަމާކުރަނީ ބޭރުފައިސާއިން ކަމުން، އެ އެސޯސިއޭޝަނަށް ލިބޭ ބޭރު ފައިސާ އެކި ފަރާތްތަކަށް ވިއްކައިގެން އެފްއޭއެމްއިން ދިވެހި ރުފިޔާ ހޯދަމުން ގެންދިޔައީ އެއްވެސް އުސޫލެއް ނެތި، އެކަމާ ގުޅޭ ރެކޯޑުވެސް ބެހެއްޓުމެއް ނެތި ކަމަށް ޕީޖީ އޮފީހުން ބުންޏެވެ

ކޮވިޑް-19 ގެ އެހީގެ ގޮތުގައި ރާއްޖޭގެ ކުލަބުތަކަށް ފީފާއިން ވަނީ 1.9 މިލިއަން ޑޮލަރު ދީފައެވެ. އޭގެ ތެރެއިން އެއް މިލިއަން ޑޮލަރު މާރުކުރުމަށްފަހު ފުލެޓް ގަތް މައްސަލައިގައި ބައްސާމާއި އިތުރު ދެ މީހެއްގެ މައްޗަށް ދައުވާކުރަން ފުލުހުން މީގެ ކުރިން ފޮނުވިއިރު، ޕީޖީ އޮފީހަށް ދައުވާކުރަން ފޮނުވާފައިވަނީ ބައްސާމުގެ އިތުރުން އަމީން އެވެނިއުގެ ވެރިފަރާތް ކަމަށްވާ އަމީން ކޮންސްޓްރަކްޝަން އާއި، އެފްއޭއެމްގެ އޭރުގެ ފައިނޭންސް ހެޑް މުޙައްމަދު އަގީލް އަދި އެފްއޭއެމްގައި އޭރު އިސްކޮށް އުޅުނު ހަސަން ވަހީދުގެ މައްޗަށެވެ.ފުލުހުން ތުހުމަތުކުރި ގޮތުގައި ބައްސާމް އަމީން އެވެނިއުއިން ދެ ފުލެޓް ގަތީ އެފްއޭއެމްގެ ފައިސާ ބޭނުންކޮށްގެންނެވެ. މި މައްސަލައިގައި ހުޅުމާޅެ މެޖިސްޓްރޭޓް ކޯޓުން ވަނީ ބައްސާމުއަށް އެޕާޓްމެންޓުތައް ހުސްކޮށް ފުލުހުންނާއި ހަވާލުކުރުމަށް އަންގާފައެވެ. ނަމަވެސް އޭރު ބައްސާމު އެދުނީ މިތަން ހުސްކުރުމަށް އިތުރު މުއްދަތެއް ދިނުމަށް ކަމުން އެ ފުރުސަތު ފުލުހުން ވަނީ ބައްސާމަށް ދީފައެވެ. އެ ދިން ފުރުސަތުގައި ބައްސާމު އަށް އެޕާޓްމެންޓް ހުސްކުރެވިފައި ނުވެއެވެ. އަނެއްކާވެސް ބައްސާމް އެދުނީ އިތުރު ފުރުސަތަކަށެވެ. ނަމަވެސް ފުލުހުންގެ އިދާރާއިން ބުނީ ބައްސާމަށް ދޭނެ އިތުރު ފުރުސަތެއް ނެތް ކަމަށާއި ކަނޑައެޅިފައިވައިވާ މުއްދަތުގެ ތެރޭގައި ބައްސާމް އެޕާޓްމެންޓްތައް ހުސްނުކޮށްފިނަމަ ފުލުހުންގެ ބެލުމުގެ ދަށަށް އެޕާޓްމެންޓުތައް ގެންދާނެ ކަމަށެވެ،

މީގެ އިތުރަށް އެފްއޭއެމްގެ އެކައުންޓުން އެފްއޭއެމްގެ ރައީސް ބައްސާމު އަދީލް ޖަލީލްގެ އެކައުންޓަށް ގިނަ އަދަދެއްގެ ފައިސާ ޖަމާކޮށްފައިވާކަން ތަހުގީގަށް ހޯދިފައިވާ ކަމަށާއި ބޭންކަށް ހުށަހަޅާ ލިޔުންތަކުގައި އެ ފައިސާއަކީ ޑޮލަރު ވިއްކައިގެން ލިބުނު ފައިސާ ކަމުގައި ލިޔެފައިވީނަމަވެސް، އެ ފައިސާއަށްވާ ދިވެހި ރުފިޔާ އެފްއޭއެމްގެ އެއްވެސް ދިވެހި ރުފިޔާ އެކައުންޓަކަށް ޖަމާކޮށްފައިނުވާ ކަމަށް ޕީޖީ އޮފީހުން ބުނެފައިވެއެވެ. އަދި މާލީ މުއާމަލާތްތައް ހެކިދޭ ގޮތުގައި އެ ފައިސާ ބައްސާމް ބޭނުންކޮށްފައި ހުންނަނީ އަމިއްލަ ބޭނުންތަކަށް ކަމަށް ވެސް ބުނެފައިވެއެވެ. އަދި އެފްއޭއެމްގެ ފައިސާ ބޭނުންކޮށްގެން ބައްސާމް ނަމުގައި ރަޖިސްޓްރީކޮށްފައިވާ ވިޔަފާރީގެ ހަރަދުތައް ބަލަހައްޓަމުން ގެންދާކަމާއި، އާއިލާގެ ހަރަދުތައް ބަލަހައްޓައި ބޭރު ދަތުރުތައް ކުރަމުންގެންދާކަން ވެސް ތަހުގީގަށް ވަނީ ހޯދިފައެވެ.