ލިވަޕޫލްގެ ކޯޗު އާން ސްލޮޓް، އެ ކްލަބުގެ ވެރިންނާއި ސީނިއާ އެގްޒެކެޓިވްސް ކަމަށްވާ ރިޗަާޑް ހިއުސް އަދި މައިކަލް އެޑްވާޑްސްގެ އިތުރުން ސަޕޯޓަރުންގެ ފަރާތުން އޭނާއަށް ބޮޑު ތާއީދެއް ލިބެމުންދާކަން ހާމަކޮށްފިއެވެ. މިކަން އޭނާ ހާމަކުރީ ފަހަކަށް އައިސް ޓީމުގެ ނަތީޖާތައް ދަށްވެފައިވާ ދަނޑިވަޅެއްގައެވެ.

ޑަޗް ކޯޗު ސްލޮޓް ބުނި ގޮތުގައި ކްލަބުގެ ފަރާތުން ލިބޭ އެހީތެރިކަމަކީ މެދުނުކެނޑި ލިބެމުންދާ އެއްޗެކެވެ. "އަހަރެން ވަރަށް ގިނަ ފަހަރު ބުނެފިން ކްލަބުގެ ވެރިންނާއި ރިޗަާޑް އަދި މައިކަލްގެ ފަރާތުން ވަރަށް ބޮޑު ސަޕޯޓެއް ލިބޭ ކަމަށް. އަދި ހައިރާންވާ ކަހަލަ ގޮތަކަށް ހީވި ނަމަވެސް، ސަޕޯޓަރުންގެ ފަރާތުން ވެސް އެ ތާއީދު އަހަންނަށް އެބައޮތް،" ސްލޮޓް ކިޔައިދިނެވެ.

Ad by Hajj Corporation

މިދިޔަ ހަފުތާގައި ޕީއެސްޖީއާ ދެކޮޅަށް ކުޅުނު މެޗުގެ ކުރިން ޕެރިހުގައި ހިނގާފައިވާ އަސަރުގަދަ ކަމެއް ވެސް އޭނާ ހިއްސާކުރިއެވެ. ސްލޮޓް ބުނީ މެންޗެސްޓާ ސިޓީ އަތުން 4-0 އިން ބަލިވެފައި އޮތް ނަމަވެސް، ޕެރިހުގެ މަގުމަތިން ފެނުނު ސަޕޯޓަރުން "ވީ ލަވް ޔޫ ލިވަޕޫލް" ކިޔައި ލަވަކިޔަމުން ދިޔަ ކަމަށެވެ. އަދި މެޗުގެ 90 މިނެޓު ނިމުނުއިރު ވެސް އަވޭ އެންޑުގައި ތިބި ސަޕޯޓަރުން ޓީމަށް ހިތްވަރު ދެމުންދިޔަކަން އޭނާ ފާހަގަކުރިއެވެ.

ސްލޮޓް އިތުރަށް ބުނީ، ކްލަބުގެ މެނޭޖްމަންޓުން މިހާރު ޓީމު އޮތް ހާލަތު ފުރިހަމައަށް ދަންނަ ކަމަށާއި، އޭނާއަށް އޮތް އިތުބާރަށް އެއްވެސް ބަދަލެއް ނާންނަ ކަމަށެވެ. މި ދަތި ދަނޑިވަޅުގައި ވެސް ކްލަބުގެ ފަރާތުން ފުރިހަމަ އެއްބާރުލުން ލިބެމުންދާކަން އޭނާ ޔަގީންކޮށްދިނެވެ.