ދިވެހިރާއްޖޭގެ ދާޚިލީ ސަލާމަތާއި ރައްކާތެރިކަން ކަށަވަރުކުރުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވި ފުރުސަތަށާއި ކުރެއްވި އިތުބާރަށްޓަކައި، މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ ޢަލީ އިޙުސާން ރައީސުލްޖުމްހޫރިއްޔާއަށް ޝުކުރު އަދާކުރައްވައިފި އެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ "ހޯމްލޭންޑް ސެކިއުރިޓީ ލޭބަރ އެންޑް ޓެކްނޮލޮޖީ" މިނިސްޓަރުކަމުގެ މަގާމަށް އައްޔަންކުރެއްވުމާ ގުޅިގެން މިނިސްޓަރު އިޙުސާން ވިދާޅުވީ، މި މަގާމަކީ ނުހަނު ފަޚުރުވެރިކަމާއި އުފަލާއެކު ބަލައިގަންނަ މަގާމެއް ކަމަށެވެ.

Ad by Hajj Corporation

އަދި މިފަދަ މަތިވެރި މަސްއޫލިއްޔަތެއް ހަވާލުކުރެއްވި ކަމަށްޓަކައި ރައީސުލްޖުމްހޫރިއްޔާއަށް ވަނީ ޚާއްޞަ ޝުކުރެއް ދަންނަވާފަ އެވެ.

މިނިސްޓަރު އިޙުސާން ވިދާޅުވީ، މިނިސްޓްރީގެ ގާބިލު އަދި ހީވާގި ޓީމާއެކު ވަރުބަލިވުމެއް ނެތި މަސައްކަތް ކުރައްވާނީ ރާއްޖޭގެ ދާޚިލީ ސަލާމަތްތެރިކަން އިތުރަށް ވަރުގަދަކުރުމަށް ކަމަށެވެ. މީގެ އިތުރުން، ދިވެހި މަސައްކަތްތެރިން ބާރުވެރިކޮށް، އެފަރާތްތަކުގެ ހައްގުތައް ހޯދައިދިނުމަށާއި، ކުރިއަރާފައިވާ ފަންނިއްޔާތުގެ އެހީގައި ރައްކާތެރި ބާއްޖަވެރި ރާއްޖެ އެއް ބިނާކުރުމަކީ އަމާޒެއް ކަމުގައި އެމަނިކުފާނު ފާހަގަކުރެއްވި އެވެ.

ދިވެހި ރައްޔިތުންނަށް ޔަގީންކަން އަރުވަމުން މިނިސްޓަރު ވިދާޅުވީ، އޭނާގެ ލަޔާގަތާއި ގާބިލުކަން ތަންދިން އެންމެ މަތީ ދަރަޖައަކަށް ގައުމަށް ޚިދުމަތް ކުރުމުގައި ދެމިހުންނާނެ ކަމަށެވެ. އަދި އެންމެހާ ފަރާތްތަކުން ގުޅިގެން، ބަދަހި، ރައްކާތެރި އަދި އީޖާދީ މުސްތަގުބަލެއް ބިނާކުރުމަށް އެމަނިކުފާނު ވަނީ ގޮވާލައްވާފަ އެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޒަޢާމަތުގައި، ޤާނޫނު ތަންފީޛުކުރާ މުއައްސަސާތަކުގެ ހިންގުން ހަރުދަނާކުރެއްވުމަށް ރައީސުލްޖުމްހޫރިއްޔާ ގެންގުޅުއްވާ ހަރުދަނާ ތަޞައްވުރުގެ ދަށުން، ދިވެހިރާއްޖޭގެ ދާޚިލީ ސަލާމަތާއި ރައްކާތެރިކަން ދެމެހެއްޓުމަށްޓަކައި ސަރުކާރުން އަންނަނީ މުހިންމު ގިނަ މަސައްކަތްތަކެއް ކުރަމުންނެވެ.