މާލެ ކަސްޓޯޑިއަލްގައި ފުލުހުންގެ ބަންދުގައި ހުއްޓާ ނިޔާވި މީހާގެ ހަށިގަނޑު، އޭނާ ނިޔާވި ސަބަބު ދެނެގަތުމަށްޓަކައި ޕޯސްޓްމޯޓަމް ހެދުމަށް ފުލުހުން ނިންމައިފި އެވެ.

މި ހާދިސާގައި ނިޔާވެފައި ވަނީ މ. ރޭއަލިވާގެއާގެ، އަޙްމަދު ނަވްޝާދު (41އ) އެވެ.

Ad by Hajj Corporation

ފުލުހުން މަޢުލޫމާތު ދީފައިވާ ގޮތުގައި، ނަވްޝާދު ބަންދު ގޮޅީގެ ތެރޭގައި ވެއްޓިފައި އޮއްވާ ފެނިގެން 2026 އޭޕްރީލް 15 ވަނަ ދުވަހުގެ ހަވީރުގެ ވަގުތެއްގައި ވަނީ އައި.ޖީ.އެމް.އެޗް ހޮސްޕިޓަލަށް ގެންގޮސްފަ އެވެ. ނަމަވެސް، ހޮސްޕިޓަލުން މަޢުލޫމާތު ދީފައިވާ ގޮތުގައި އޭނާ ހޮސްޕިޓަލަށް ގެންދިޔަ އިރުވެސް ވަނީ ނިޔާވެފަ އެވެ.

ފުލުހުން ބުނީ، އޭނާ ނިޔާވީ ފުލުހުންގެ ބަންދުގައި ހުއްޓާ ކަމަށްވާތީ، މަރުގެ ސަބަބު ކަށަވަރުކުރުމަކީ މުހިންމު ކަމެއް ކަމަށް ފެންނާތީ ހަށިގަނޑުގެ ޕޯސްޓްމޯޓަމް ހެދުމަށް މިހާރު ނިންމާފައިވާ ކަމަށެވެ.

މި ހާދިސާއާ ގުޅިގެން ބަލަންޖެހޭ ކަންކަން ބެލުމަށްޓަކައި، ފުލުހުން ވަނީ މި ހާދިސާގެ މަޢުލޫމާތު ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗް.އާރު.ސީ.އެމް) އަދި ނޭޝަނަލް އިންޓަގްރިޓީ ކޮމިޝަން (އެން.އައި.ސީ) އަށް ވެސް ހިއްސާކޮށްފަ އެވެ. މިފަދަ ހާދިސާތަކުގައި އަމަލުކުރާ އުސޫލުގެ ދަށުން، މި މައްސަލަ މިހާރު ދަނީ އިތުރަށް ތަޙުޤީޤު ކުރަމުންނެވެ.