ކެނެޑާގައި ބޭއްވުމަށް ހަމަޖެހިފައިވާ ފީފާ ކޮންގްރެސްގައި ބައިވެރިވުމަށް ފަލަސްތީނުގެ ފުޓްބޯޅަ އެސޯސިއޭޝަނުގެ މަންދޫބުންނަށް ކެނެޑާއަށް އެތެރެވުމުގެ ވިސާ ނުލިބުނު ކަމަށް ދަ ގާޑިއަން ނޫހުން ރިޕޯޓްކޮށްފިއެވެ.

މި ކޮންގްރެސްގައި ބައިވެރިވުމަށް ވިސާ ނުލިބުނު އޮފިޝަލުންގެ ތެރޭގައި ފަލަސްތީނުގެ ފުޓްބޯޅަ އެސޯސިއޭޝަނުގެ ރައީސް ޖިބްރީލް ރަޖޫބު ހިމެނޭހެން ޖުމްލަ ތިން އޮފިޝަލަކު ހިމެނެއެވެ. މި މައްސަލައާ ގުޅިގެން ފަލަސްތީނުގެ ފަރާތުން ވަނީ ކެނެޑާގެ އިމިގްރޭޝަން އިދާރާތަކާއެކު ވާހަކަދައްކައި، މިކަމުގައި އެހީތެރިކަން ފޯރުކޮށްދިނުމަށް ފީފާގެ ކިބައިން އެދިފައެވެ.

Ad by Hajj Corporation

ކޮންމެ އަހަރަކު ބާއްވާ ފީފާގެ އަހަރީ ކޮންގްރެސް މިއަހަރު ބޭއްވުމަށް ހަމަޖެހިފައިވަނީ އޭޕްރީލް މަހުގެ 30 ވަނަ ދުވަހު ކެނެޑާގެ ވެންކޫވަރުގައެވެ. މި ބައްދަލުވުމަކީ ބައިނަލްއަގުވާމީ ފުޓްބޯޅައިގެ މުހިންމު ނިންމުންތައް ނިންމާ ބައްދަލުވުމެކެވެ.

ޚަބަރުތައް ލިބޭގޮތުގައި، ފަލަސްތީނުގެ މަންދޫބުން މި ކޮންގްރެސްގެ ބޭނުން ހިފުމަށް ގަސްދުކޮށްފައިވަނީ އިޒްރޭލުގެ ފުޓްބޯޅަ ކްލަބުތަކުން ހިފާފައިވާ ހުޅަނގު އައްސޭރީގެ ސަރަހައްދުތަކުގައި ރަސްމީ މެޗުތައް ކުޅޭ މައްސަލަ ފީފާގެ ސަމާލުކަމަށް ގެނައުމަށެވެ. ފަލަސްތީނުން ދެކޭގޮތުގައި މިއީ ބައިނަލްއަގުވާމީ ގާނޫނުތަކާ ޚިލާފަށް ހިންގާ އަމަލުތަކެކެވެ.