ޅ. އަތޮޅުގެ ފަޅުރަށަކަށް ދަތުރުދިޔަ ބަޔަކަށް ފެނުނު ފަސް ފޫޓު ދިގު ކިނބުލެއް ހިފައި، އެމްއެންޑީއެފް ނޮދަން އޭރިއާ ކޮމާންޑްގެ ސިފައިންނާ ހަވާލުކޮށްފިއެވެ.

އެމްއެންޑީއެފުން މަޢުލޫމާތު ދީފައިވާ ގޮތުގައި މި ކިނބޫ ފެނިފައިވަނީ ޑިންގީއެއްގައި ޅ. އަތޮޅު ދިއްދޫ ނަމަކަށް ކިޔާ ފަޅުރަށަށް ދަތުރުދިޔަ ބަޔަކަށެވެ. މި ކިނބޫ ފެނިފައިވަނީ މިއަދު ހެނދުނު 07:00 ހާއިރު ކަމަށްވެސް އެމްއެންޑީއެފުން ބުނެފައިވެއެވެ.

Ad by Hajj Corporation

ދިގުމިނުގައި 5 ފޫޓު ހުރި މި ކިނބޫ ފެނުމާއެކު، އެ ރަށަށް ދަތުރުދިޔަ މީހުން ވަނީ އެ ހިފައިގެން ޅ. ނައިފަރަށް ގެންގޮސްފައެވެ.

މި ހާދިސާގެ މަޢުލޫމާތު އެމްއެންޑީއެފް ނޮދަން އޭރިއާ ކޮމާންޑް، ކޯސްޓްގާޑް ފަސްޓް ސްކޮޑްރަންއަށް ލިބިފައިވަނީ ޅ. ނައިފަރު ޕޮލިސް ސްޓޭޝަންގެ ފަރާތުން މިއަދު ހެނދުނު 10:51 ހާއިރުއެވެ.

މި ހާދިސާގެ މަޢުލޫމާތު ލިބުމާއެކު، އެމްއެންޑީއެފް ކޯސްޓްގާޑް ފަސްޓް ސްކޮޑްރަންގެ ސިފައިން ވަނީ ހާބަރކްރާފްޓެއްގައި ނައިފަރަށް ގޮސްފައެވެ. އަދި އެ ކިނބޫ މިހާރު ވަނީ ސިފައިންގެ ބެލުމުގެ ދަށަށް ގެންގޮސް، ޅ. މާފިލާފުއްޓަށް ގެންގޮސްފައެވެ.