އިނގިރޭސި ޕްރިމިއާ ލީގުގައި ރޭ ސްޓެމްފޯޑް ބްރިޖްގައި ކުޅުނު މެޗުން ޗެލްސީގެ މައްޗަށް 1-0 އިން ކުރިހޯދައި، މެންޗެސްޓާ ޔުނައިޓެޑުން އަންނަ ސީޒަނުގެ ޗެމްޕިއަންސް ލީގުން ފުރުސަތު ހޯދުމާ ގާތަށް ޖެހިލައިފިއެވެ. މިއީ ލީގުގައި ޗެލްސީ ޖެހިޖެހިގެން ބަލިވި ހަތަރުވަނަ މެޗެވެ.

މެޗުގެ ހަމައެކަނި ލަނޑު ފުރަތަމަ ހާފު ނިމެން އުޅެނިކޮށް ކާމިޔާބުކޮށްދިނީ މެތިއުސް ކޫންހާއެވެ. މިއީ މި ސީޒަނުގައި ބްރޫނޯ ފެނާންޑޭޒް ތަނަވަސްކޮށްދިން 18 ވަނަ އެސިސްޓެވެ. މި ލަނޑާއެކު ކޫންހާ ވެފައިވަނީ ޗެލްސީއާ ދެކޮޅަށް އެންމެ ގިނަ ލަނޑު ޖެހި ކުޅުންތެރިޔާއަށެވެ.

Ad by Hajj Corporation

މެޗުގެ ބޮޑު ބައެއްގައި ޗެލްސީން ގިނަ ހަމަލާތަކެއް އުފެއްދި ނަމަވެސް، ޔުނައިޓެޑުގެ ދިފާއީ ފާރު ފޫއަޅުވާލެވޭ ގޮތެއް ނުވިއެވެ. ޗެލްސީން ޖުމްލަ 21 ހަމަލާ ފޮނުވާލިއިރު، އަމާޒަށް ދިޔައީ އެންމެ ހަމަލާއެކެވެ. މީގެ ތެރެއިން ލިއަމް ޑެލަޕް އަދި ވެސްލީ ފޮފާނާ ފޮނުވާލި ހަމަލާތައް އަމާޒުވީ ގޯލުގެ ދަނޑިއަށެވެ.

ޔުނައިޓެޑުގެ މުހިންމު ޑިފެންޑަރުންތަކެއް އަނިޔާގައި ތިބި ނަމަވެސް، ޒުވާން އައިޑަން ހެވަން އާއި ނުސައިރު މަޒްރާއީ ވަނީ ފާހަގަކޮށްލެވޭ މޮޅު ކުޅުމެއް ދައްކާފައެވެ. މައިކަލް ކެރިކްގެ އިރުޝާދުގެ ދަށުން ކުޅެމުން އަންނަ ޔުނައިޓެޑް މިހާރު އޮތީ ޗެލްސީއަށްވުރެ 10 ޕޮއިންޓް ކުރީގައެވެ.

ތަފާސްހިސާބުތަކަށް ބަލާއިރު، ޔުނައިޓެޑަށް ގަދަ ހަތަރެއްގެ ޖާގައެއް ލިބުމުގެ ފުރުސަތު މިހާރު ވަނީ 98.4 އިންސައްތައަށް އުފުލިފައެވެ. އަނެއްކޮޅުން ޗެލްސީއަށް މި ފުރުސަތު އޮތީ އެންމެ 8 އިންސައްތައިގައެވެ. މިއީ 1998 ވަނަ އަހަރަށްފަހު ލަނޑެއް ނުޖެހި ޗެލްސީ ޖެހިޖެހިގެން ހަތަރު މެޗުން ބަލިވި ފުރަތަމަ ފަހަރެވެ.

މި މެޗުގައި ދެއްކި މޮޅު ކުޅުމާއެކު ބްރޫނޯ ފެނާންޑޭޒް މިހާރު ހުރީ ޕްރިމިއާ ލީގުގެ އެއް ސީޒަނެއްގައި އެންމެ ގިނަ އެސިސްޓް ދިނުމުގެ ރެކޯޑާ އެންމެ ދެ އެސިސްޓް ފަހަތުގައެވެ. މި ރެކޯޑް މިހާރު ހިއްސާކުރަނީ ކެވިން ޑި ބްރޭނާ އާއި ތިއަރީ އޮންރީއެވެ.