މާލޭގެ މަގުތަކުގައި ކޮންމެ ރެއަކު ރައްޔިތުންނަށް ދަތިވާގޮތަށް ކުރިއަށްގެންދާ މުޒާހަރާތަކަކީ އެއްވެސް އަސާސެއް އޮވެގެން ކުރާ ކަންކަން ނޫން ކަމަށާއި، އެއީ ހަމައެކަނި ފޮޓޯ ކޮޅެއް ހޯދާލުމަށް ކުރާ ކަމެއް ކަމަށް ބާރަށު ދާއިރާގެ މަޖިލިސް މެންބަރު އިބްރާހީމް ޝުޖާއު ވިދާޅުވެއްޖެއެވެ.

ޝުޖާއު ވިދާޅުވީ މާލޭގެ މަގުތައް ހަލަބޮލިކޮށް ރައްޔިތުންނަށް ދަތިވާގޮތަށް ކޮންމެ ރެއަކު ކުރަމުންދާ މުޒާހަރާތަކަކީ ސަރުކާރުން ވަކިކަމެއް ގޯސްކޮށް ކޮށްގެން ނުވަތަ ކުރާތީ ކުރާ މުޒާހަރާތަކެއް ނޫން ކަމަށެވެ. އަދި މި ވަގުތަކީ ސިޔާސީ ގޮތުން އެއްވެސް މީހަކަށް އަނިޔާއެއް ލިބެމުންދާ ވަގުތެއް ނޫންކަން އޭނާ ފާހަގަކުރެއްވިއެވެ.

Ad by Hajj Corporation

"ޕާޓީގެ ލީޑަރުން ތިއްބެވީ ހެޔޮހާލުގައި ގޭގައި. ނުހައްޤުން ޖަލުގައި ހުރި އެކަކުވެސް ނެތް. ސިޔާސީ އަނިޔާ ލިބެމުންދާ އެކަކުވެސް މިހާރަކު ނެތް،" ޝުޖާއު ވިދާޅުވިއެވެ.

ޝުޖާއު އިތުރަށް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންދަވަނީ ރައްޔިތުންނަށް ބޭނުންވާ ކަންކަން ދެނެގަނެ، އިޞްލާޙު ކުރަންޖެހޭ ކަންކަން ރަނގަޅު ކުރައްވަމުން ކަމަށެވެ. އަދި ސަރުކާރުން ރައްޔިތުންނަށް ފޯރުކޮށްދޭ ޚިދުމަތްތައް އިތުރަށް ފުރިހަމަކުރުމަށް ރައީސް އިސްނަންގަވައިގެން ގިނަ މަސައްކަތްޕުޅުތަކެއް ކުރައްވަމުންދާ ކަމަށްވެސް އޭނާ ވިދާޅުވިއެވެ.

މި މުޒާހަރާތަކުގެ އަސްލު މަޤްޞަދާ ގުޅޭގޮތުން ވާހަކަދައްކަވަމުން ޝުޖާއު ވިދާޅުވީ، މިއީ ކުރިއަށް އޮތް އެމްޑީޕީގެ އެތެރޭގެ އިންތިޚާބަށް ވާދަކުރައްވާ އެ ޕާޓީގެ މެންބަރުން "ޕޮލިޓިކަލް އިމޭޖް" ހޯދުމަށް ކުރާ ކަމެއް ކަމަށެވެ. މުޒާހަރާގެ ތެރެއިން ފޮޓޯ ނަގައި، "ޤުރުބާންވީ ތިމަންނައޭ" ބުނެ ޕާޓީގެ މެންބަރުންނަށް ދެއްކުމަކީ މި މުޒާހަރާތަކުގެ މައިގަނޑު ބޭނުން ކަމަށް އޭނާ ތުހުމަތު ކުރެއްވިއެވެ.

މާލޭގައި ދިރިއުޅޭ ރައްޔިތުންނަށް އެއްވެސް އަސާސެއް ނެތް ކަންކަމުގައި މިފަދަ އުނދަގޫތައް ކުރިމަތިކުރުވުމަކީ ޒިންމާދާރުކަން ކުޑަ އަމަލެއްގެ ގޮތުގައި ޝުޖާއު ވަނީ ސިފަކުރައްވާފައެވެ.