ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި އިލެކްޝަންގައި ޕީއެންސީގެ ޓިކެޓުގައި ވާދަކުރާނެ ކެންޑިޑޭޓަކު ކަނޑައަޅަން ބާއްވާ ޕްރައިމަރީގައި ވޯޓުލުމުގެ ފުރުސަތު 727 މެމްބަރުންނަށް ލިބިގެންވާ ކަމަށް އެ ޕާޓީން މިއަދު ހާމަކޮށްފިއެވެ.

މި ޕްރައިމަރީ ބޭއްވުމަށް ހަމަޖެހިފައިވަނީ ކުރިއަށް އޮތް ހޮނިހިރު ދުވަހުއެވެ.

Ad by Hajj Corporation

ޕީއެންސީން ބުނި ގޮތުގައި ޕްރައިމަރީގެ ވޯޓުލުން ކުރިއަށްދާނީ ހޮނިހިރު ދުވަހުގެ ހެނދުނު 9:00 އިން ހަވީރު 4:00 އަށެވެ. ވޯޓުލުމަށްޓަކައި ހިތަދޫ އުތުރު ދާއިރާގެ އިތުރުން މާލޭގައި ވެސް ވޯޓުފޮށި ބެހެއްޓުމަށް ވަނީ ނިންމާފައެވެ.

ވޯޓުލާ މީހުން ރަޖިސްޓަރީ ކުރެވިފައިވާ ގޮތަށް ބަލާއިރު، މި މަހުގެ ހަތަރު ވަނަ ދުވަހު ބޭއްވި ލޯކަލް ކައުންސިލްތަކުގެ އިންތިހާބުގައި ހިތަދު އަށް ވޯޓުލާން ރަޖިސްޓަރީ ކުރި މީހުންނަށް ވޯޓުލެވޭނީ ހިތަދޫގައި ބަހައްޓާ ފޮށިތަކަށެވެ. އަދި މާލެ އާއި އެހެނިހެން ރަށްރަށުގައި ވޯޓުލާން ރަޖިސްޓަރީކުރި މީހުންނަށް ވޯޓުލެވޭނީ މާލޭގައި ބަހައްޓާ ފޮށިތަކަށް ކަމަށް އެ ޕާޓީން މައުލޫމާތު ދެއެވެ.

މި ޕްރައިމަރީގައި ވާދަކުރައްވަނީ ދެ ކެންޑިޑޭޓުންނެވެ. އެއީ ރައްޔިތުންގެ މަޖިލިހުގެ އެ ދާއިރާގެ ކުރީގެ މެމްބަރު މުހައްމަދު ސިނާނާއި، ހިތަދޫ މޫލެކެޑެ ދާއިރާގެ ކައުންސިލަރުގެ މަގާމުގައި ހުންނެވި އަހުމަދު ސައީދު (ސޮޑާ) އެވެ. ޕްރައިމަރީއަށް ކުރިމަތިލުމުގެ މުއްދަތު ހަމަވީ މިދިޔަ އާދިއްތަ ދުވަހުއެވެ.