ކޮޕާ އިޓަލިއާ ސެމީ ފައިނަލްގެ ދެވަނަ ލެގުގައި ކޯމޯއާ ދެކޮޅަށް ކުޅުނު މެޗު 3-2 އިން ކާމިޔާބުކޮށް، އިންޓަ މިލާނުން މުބާރާތުގެ ފައިނަލުން ޖާގަ ހޯދައިފިއެވެ. އަންގާރަ ދުވަހުގެ ރޭ ކުޅުނު މި ފޯރިގަދަ މެޗުގައި އިންޓަ މޮޅުވީ ދެ ލަނޑުގެ ފަހަތުގައި އޮތުމަށްފަހު، މެޗުގެ ފަހުކޮޅު ކާމިޔާބުކުރި ލަނޑުތަކުންނެވެ.

ސްޓޭޑިއޯ ގިސެއްޕޭ މިއާޒާގައި ކުޅުނު މި މެޗުގެ ފުރަތަމަ ހާފުގައި ކޯމޯއިން ވަނީ މޮޅު ކުޅުމެއް ދައްކާފައެވެ. މެޗުގެ 32 ވަނަ މިނެޓުގައި މާޓިން ބަޓުރީނާ ވަނީ ލަނޑެއް ޖަހައި ކޯމޯއަށް ކުރިހޯދައިދީފައެވެ. އަދި ދެވަނަ ހާފު ފެށިގެން ތިންވަނަ މިނެޓުގައި އެ ޓީމުގެ ކެޕްޓަން ލޫކަސް ޑަ ކުންހާ ވަނީ އިތުރު ލަނޑެއް ޖަހައި ނަތީޖާ 2-0 އަށް ބަދަލުކޮށްފައެވެ.

Ad by Hajj Corporation

އިންޓަ މިލާނުން މެޗުގެ އޮއިވަރު ބަދަލުކޮށްލީ 60 ވަނަ މިނެޓުގައި ޕީޓަ ސޫސިޗް ކުޅެން އެރުވުމާ އެކުގައެވެ. ހަކަން ޗަނަނޮގްލޫ ވަނީ ސޫސިޗް ތަނަވަސްކޮށްދިން ފުރުސަތުތަކެއްގައި ދެ ލަނޑު ޖަހައި ނަތީޖާ އެއްވަރުކޮށްދީފައެވެ. ފުރަތަމަ ލަނޑު އޭރިއާ ބޭރުން ފޮނުވާލި ހަމަލާއަކުން ކާމިޔާބުކުރިއިރު، ދެވަނަ ލަނޑަކީ މެޗު ނިމެން ހަތަރު މިނެޓަށް ވެފައި ވަނިކޮށް ބޮލުން ޖެހި ލަނޑެކެވެ.

މެޗުން އިންޓަ މޮޅުކޮށްދިން ލަނޑު 89 ވަނަ މިނެޓުގައި ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ނިކުތް ސޫސިޗްއެވެ. ޗަނަނޮގްލޫއާ ގުޅިގެން އުފެއްދި މި ހަމަލާ އޭނާ ވަނީ ގޯލުގެ ތިރީ ކަނަށް ފޮނުވާލައި، އިންޓަގެ ސަޕޯޓަރުން އުފާވެރިކަމުގެ ތެރެއަށް ގަންބާލާފައެވެ.

މި މެޗުގައި ޗަނަނޮގްލޫ ވަނީ ތާރީޚީ ކުޅުމެއް ދައްކާފައެވެ. މިއީ އިންޓަގެ ޖާޒީގައި އެއް މެޗެއްގައި އޭނާ ތިން ގޯލުގައި (ލަނޑާއި އެސިސްޓް ހިމެނޭހެން) ބައިވެރިވި ފުރަތަމަ ފަހަރެވެ. އަދި މިއީ އެ ޓީމަށް އޭނާ ބޮލުން ޖަހައިދިން ފުރަތަމަ ލަނޑުވެސްމެއެވެ. ސޫސިޗް ވަނީ މަދު ވަގުތުކޮޅެއްގެ ތެރޭގައި އިންޓައަށް އެންމެ ގިނަ ފުރުސަތު ތަނަވަސްކޮށްދިން ކުޅުންތެރިޔާގެ މަގާމު ހޯދާފައެވެ.

ކޮޕާ އިޓަލިއާގެ ފައިނަލުގައި އިންޓަ މިލާން ބައްދަލުކުރަން ޖެހޭނީ އެޓަލަންޓާ ނުވަތަ ލާޒިއޯއާއެވެ. މިއީ 2022-23 ވަނަ އަހަރުގެ ސީޒަނަށްފަހު އިންޓަ މި މުބާރާތުގެ ފައިނަލަށް ދަތުރުކުރި ފުރަތަމަ ފަހަރެވެ.