ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އަށް މިއަހަރުގެ ފުރަތަމަ ކުއާޓަރުގައި ޖުމްލަ ފައިދާގެ ގޮތުގައި 785 މިލިއަން ރުފިޔާ ލިބިއްޖެއެވެ.

އެސްޓީއޯގެ ވެބްސައިޓުގައި އަހަރުގެ ފުރަތަމަ ކުއާޓަރުގެ މާލީ ހިސާބުތައް މިހާރު އާންމުކޮށްފައިވާއިރު މި ހިސާބުތަކުން ދައްކާގޮތުގައި، މި އަހަރުގެ ފުރަތަމަ ތިން މަސް ދުވަހުގެ ތެރޭގައި އެ ކުންފުންޏަށް ޖުމްލަ އާމްދަނީގެ ގޮތުގައި 5.5 ބިލިއަން ރުފިޔާ ވަނީ ލިބިފައެވެ.

Ad by Hajj Corporation

ކުންފުނީގެ އާމްދަނީ އިތުރުވުމުގެ މައިގަނޑު ސަބަބުތަކުގެ ތެރޭގައި މެދުއިރުމަތީގެ ހަމަނުޖެހުންތަކާ ގުޅިގެން ދުނިޔޭގެ ބާޒާރުގައި ތެލުގެ އަގު މައްޗަށް ދިއުން ހިމެނެއެވެ. މީގެ އިތުރުން، ބަންކަރިން ހިމެނޭ ގޮތަށް އެ ކުންފުނިން ވިއްކި ތެލުގެ އަދަދު މި ކުއާޓަރުގައި 27 ޕަސެންޓް އިތުރުވެފައިވާއިރު، ކުންފުނީގެ އެހެނިހެން ދާއިރާތަކުގެ ވިޔަފާރި ރަނގަޅުވުމަކީވެސް އާމްދަނީ އިތުރުވި ސަބަބެއް ކަމަށް އެސްޓީއޯއިން ބުނެއެވެ.

މާލީ ރިޕޯޓުތަކަށް ބަލާއިރު، މި ކުއާޓަރުގައި ލިބުނު 785 މިލިއަން ރުފިޔާގެ ޖުމްލަ ފައިދާއަކީ އޭގެ ކުރީ ކުއާޓަރާ އަޅާބަލާއިރު 17 ޕަސެންޓްގެ އިތުރުވުމެކެވެ. ކުންފުނީގެ ހިންގުމުގެ ހަރަދުތައް ނިސްބަތުން އިތުރުވި ނަމަވެސް، ހިންގުމުގެ ފައިދާ ވަނީ 14 ޕަސެންޓް އިތުރުވެ، 368 މިލިއަން ރުފިޔާއަށް އަރާފައެވެ.

އެސްޓީއޯއިން ހާމަކުރި ގޮތުގައި، ފައިނޭންސް ކުރުމުގެ ހަރަދުތައް ކުޑަކުރެވުމާއެކު، ޓެކުހަށް ކެނޑުމުގެ ކުރިން ސާފު ފައިދާގެ ގޮތުގައި 331 މިލިއަން ރުފިޔާ ވަނީ ލިބިފައެވެ. މިއީ ކުރީ ކުއާޓަރާ އަޅާބަލާއިރު 20 ޕަސެންޓްގެ ކުރިއެރުމެކެވެ. އަދި ޓެކުހަށް ކެނޑުމަށްފަހު، މި ކުއާޓަރުގެ ސާފު ފައިދާގެ ގޮތުގައި އެ ކުންފުންޏަށް 276 މިލިއަން ރުފިޔާ ލިބިފައިވެއެވެ.

މި ކާމިޔާބީއާ ގުޅިގެން އެސްޓީއޯއިން ބުނީ، ކުންފުނީގެ ވިޔަފާރީގެ އެންމެހާ ބައިވެރިން އެސްޓީއޯގެ ކަންކަމުގައި ބަހައްޓާ ގާތްކަމާއި ދެއްވާ އެހީތެރިކަމަށް ނިހާޔަތަށް ޝުކުރު ދަންނަވާ ކަމަށެވެ. މި ހިސާބުތަކަކީ އިދިކޮޅު ފަރާތްތަކުން ފަތުރަމުންދާ ދޮގު ވާހަކަތަކަށް ލިބިގެންދާ ސާފު ރައްދެއްގެ ގޮތުގައި ވަނީ ފާހަގަކުރެވިފައެވެ.