ރިޒާވް ބެންކު އޮފް އިންޑިއާއިން 2024 ވަނަ އަހަރު ނަގާފައިވާ 400 މިލިޔަން ޑޮލަރުގެ ލޯނު މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އަނބުރާ ދައްކައިފިއެވެ.

މި ލޯނަކީ 2024 ވަނަ އަހަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޑިއާއަށް ކުރެއްވި ދަތުރުފުޅެއްގެ ތެރެއިން ޤާއިމުކުރި ކަރަންސީ ސްވޮޕް އެއްބަސްވުމެއްގެ ދަށުން ދޫކުރި ލޯނެކެވެ. ސަރުކާރުން ބުނީ ލޯނު ދައްކަންޖެހޭ ވަގުތު ހަމަވިއިރު އެ ލޯނު ދައްކައި ޚަލާސްކޮށްފައިވާ ކަމަށެވެ.

Ad by Hajj Corporation

މި ލޯނު ދެއްކުމާ އެކު، އިންޑިއާއިން މިހާރު ވަނީ އިތުރު 30 ބިލިޔަން އިންޑިއާ ރުޕީސް ނުވަތަ 319 މިލިޔަން އެމެރިކާ ޑޮލަރުގެ ލޯނެއް ރާއްޖެއަށް ހަމަޖައްސައިދީފައެވެ. ސަރުކާރުން ބުނީ މި ލޯނުން މިވަގުތު ކުރިމަތިވަމުންދާ މާލީ ދަތިތަކަށް ހައްލު ހޯދުމާ އެކު އިޤްތިޞާދީ ތަރައްޤީއަށް މަސައްކަތްކުރެވޭނެ ކަމަށެވެ. އިންޑިއާއިން މި ލޯނު ހަމަޖެއްސުމާ ގުޅިގެން ދިވެހި ސަރުކާރުން ވަނީ އެކަމަށް ޝުކުރު އަދާކޮށް، ރާއްޖޭގެ ތަރައްޤީގައި އިންޑިއާއިން އަދާކުރާ ދައުރު ފާހަގަކޮށްފައެވެ.

މީގެ އިތުރުން 2019 ވަނަ އަހަރު ސްޓޭޓް ބޭންކު އޮފް އިންޑިއާ މެދުވެރިކޮށް ރާއްޖެއަށް ހަމަޖައްސައިދިން 150 މިލިޔަން ޑޮލަރުގެ ތެރެއިން 50 މިލިޔަން ޑޮލަރު ވެސް ސަރުކާރުން ވަނީ ދައްކައި ޚަލާސްކޮށްފައެވެ.