އިންޑިއާގެ 80 ވަނަ މިނިވަން ދުވަހުގެ އުފާވެރި މުނާސަބަތުގައި، އެ ޤައުމުގެ ސަރުކާރަށާއި ލޮބުވެތި ރައްޔިތުންނަށް ރައީސުލްޖުމްހޫރިއްޔާގެ ނައިބު ހުސައިން މުހައްމަދު ލަތީފު ވަރަށް ތަހުނިޔާ އާއި ހެޔޮއެދުންތައް އަރިސްކުރައްވައިފި އެވެ.

އެމަނިކުފާނު ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ފާހަގަކުރައްވާފައިވާ ގޮތުގައި، ދިވެހިރާއްޖެއާއި އިންޑިއާއަކީ ޒަމާނުއްސުރެއްސުރެ ވަރަށް ގާތް އަދި ބަދަހި ރަހުމަތްތެރިކަމެއް ދަމަހައްޓަމުން އަންނަ ދެ ގައުމެވެ. އަދި ކުރިއަށް އޮތް އަހަރުތަކުގައިވެސް އިންޑިއާއަށް ދެމެހެއްޓެނިވި އަމާންކަމާއި، އިތުރު ކުރިއެރުމާއި، ބާއްޖަވެރިކަމަށް އެދިވަޑައިގަންނަވާ ކަމަށް ނައިބު ރައީސް ވަނީ ވިދާޅުވެފަ އެވެ.

Ad by Hajj Corporation

ކޮންމެ އަހަރެއްގެ އޯގަސްޓް މަހުގެ 15 ވަނަ ދުވަހަކީ، 1947 ވަނަ އަހަރުގެ އޯގަސްޓް މަހު އިނގިރޭސީންގެ އިސްތިއުމާރު ނިމުމަކަށް އައިސް އިންޑިއާއަށް މިނިވަންކަން ލިބުނު ދުވަސްކަމަށްވާއިރު، މިއީ އެ ގައުމުގެ ރައްޔިތުން ފަހުރުވެރިކަމާއެކު ފާހަގަކުރާ ދުވަހެކެވެ. މި ފަދަ މުހިންމު ދުވަހެއްގެ ހަނދާން އައުކުރަމުންދާއިރު، ރާއްޖެއާއި އިންޑިއާއާ ދެމެދު އޮތް ޒަމާނީ ގުޅުން އިތުރަށް ހަރުދަނާކޮށް ކުރިއެރުވުމަށް ސަރުކާރުން ދަނީ ވަރަށް ހާއްސަ މަސައްކަތްތަކެއް ކުރަމުންނެވެ.

އެގޮތުން ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އިންޑިއާއަށް ރަސްމީ ދަތުރުފުޅެއް ކުރައްވާފައިވާއިރު، އިންޑިއާގެ ބޮޑުވަޒީރު ނަރެންދްރަ މޯދީވެސް ވަނީ ދިވެހިރާއްޖެއަށް ވަޑައިގެންފައެވެ. މިފަދަ މަތީ ފެންވަރުގެ ރަސްމީ ބައްދަލުވުންތަކާއި ދަތުރުފުޅުތަކުގެ ތެރެއިން ދެ ގައުމުގެ މަސްލަހަތު ކަންކަމާއި، ދެ ގައުމަށްވެސް ފައިދާކުރަނިވި މުހިންމު އެއްބަސްވުންތަކެއް ވަނީ އެކުލަވާލާފައެވެ. މިއީ ދެ ގައުމުގެ ދެމެދުގައި އޮތް ގުޅުން އިތުރު ހަރުފަތަކަށް ގެންގޮސްދީ، ސަރަހައްދީ ސުލްހައާއި ތަރައްގީއަށް މަގުފަހިވެގެންދާނެ ކަމެކެވެ.