އިނގިރޭސި ޕްރިމިއާ ލީގުގައި ރޭ ކުޅުނު މެޗުގައި އެބެރެޗީ އެޒޭގެ ލަނޑުން ނިއުކާސަލް ޔުނައިޓެޑް 1-0 އިން ބަލިކޮށް، އާސެނަލްއިން އަލުން ތާވަލުގެ އެއްވަނައަށް ޖެހިލައިފިއެވެ. މި މޮޅާއެކު އާސެނަލްއަށް ވަނީ ތާވަލުގެ ކުރީގައި ތިން ޕޮއިންޓުގެ ލީޑެއް ލިބިފައެވެ.

އެމިރޭޓްސް ސްޓޭޑިއަމްގައި ކުޅުނު މި މެޗުގެ ހަމައެކަނި ލަނޑު ފެނިގެންދިޔައީ މެޗުގެ 9 ވަނަ މިނެޓުގައެވެ. މިއީ އާސެނަލްއިން ލިބުނު ކޯނަރެއްގައި ރޭވިފައިވާ ރީތި ކުޅުމަކަށްފަހު، އެޒޭ ގޯލުގެ މަތީ ކަނަށް ފޮނުވާލައިގެން ކާމިޔާބުކުރި ލަނޑެކެވެ. މި ލަނޑާއެކު އާސެނަލްއިން ވަނީ އެއް ސީޒަނެއްގައި ކޯނަރުތަކުން އެންމެ ގިނަ ލަނޑު ޖެހުމުގެ ރެކޯޑު (17 ލަނޑު) މުގުރާލާފައެވެ.

Ad by Hajj Corporation

މެޗުގެ ފުރަތަމަ ހާފުގައި ނިއުކާސަލްގެ ސަންދްރޯ ޓޮނާލީ ފޮނުވާލި ނުރައްކާތެރި ހަމަލާއެއް އާސެނަލްގެ ކީޕަރު ޑޭވިޑް ރާޔާ ވަނީ ހުށިޔާރުކަމާއެކު ދިފާއުކޮށްފައެވެ. އަދި މެޗުގެ ފަހުކޮޅު އާސެނަލްގެ ކެޕްޓަން މާޓިން އޮޑެގާޑް ފޮނުވާލި ބާރު ހަމަލާއެއް ނިއުކާސަލްގެ ކީޕަރު ނިކް ޕޯޕް ދިފާއުކުރިއެވެ.

މި ނަތީޖާއާއެކު އާސެނަލް ތާވަލުގެ އެއްވަނައިގައި އޮތީ 32 މެޗުން ލިބުނު ޕޮއިންޓާއެކުގައެވެ. ދެވަނައިގައި އޮތް މެންޗެސްޓާ ސިޓީއަށް ލިބިފައިވަނީ 31 މެޗުން ޕޮއިންޓެވެ. ސިޓީއަށް މަދުވެފައިވާ މެޗަކީ އެފްއޭ ކަޕްގައި ކުޅެން ޖެހުމުގެ ސަބަބުން ފަސްކުރެވުނު މެޗެކެވެ.

ނިއުކާސަލްއަށް ބަލާއިރު، މިއީ މި ސީޒަނުގައި އެޓީމު ބަލިވި 16 ވަނަ މެޗެވެ. މިއީ 2020-21 ވަނަ އަހަރުގެ ސީޒަނަށްފަހު އެޓީމު އެންމެ ގިނައިން ބަލިވި ސީޒަނެވެ. މި ބައްޔާއެކު އެޓީމުގެ ކޯޗު އެޑީ ހޯވްއަށް އޮތް ޕްރެޝަރު ވަނީ އިތުރަށް ބޮޑުވެފައެވެ.