ސްޕެނިޝް ލަލީގާގައި ހޮނިހިރު ދުވަހު ރޭ ރަށުން ބޭރުގައި ގެޓާފޭއާ ދެކޮޅަށް ކުޅުނު މެޗު 2-0 އިން ކާމިޔާބުކޮށް، ބާސެލޯނާއިން ތާވަލުގެ އެއްވަނައިގައި 11 ޕޮއިންޓުގެ ލީޑެއް ނަގައިފިއެވެ. މި މޮޅާއެކު ހަންސީ ފްލިކްގެ އިރުޝާދުގެ ދަށުން ކުޅެމުން އަންނަ ބާސެލޯނާއަށް ވަނީ ލީގު ތަށި ދިފާއުކުރުމުގެ ފުރުސަތު ވަރަށް ބޮޑަށް ތަނަވަސްވެފައެވެ.

ބާސެލޯނާއަށް މި ފުރުސަތު ބޮޑުވީ ހުކުރު ދުވަހު ރެއާލް މެޑްރިޑާއި ރެއާލް ބެޓިސް ބައްދަލުކުރި މެޗު 1-1 އިން އެއްވަރުވުމާ ގުޅިގެންނެވެ. ގެޓާފޭގެ ދަނޑުގައި ކުޅުނު މި މެޗުގައި ބާސެލޯނާގެ ލަނޑުތައް ކާމިޔާބުކޮށްދިނީ ފާމިން ލޮޕޭޒް އަދި މާކަސް ރަޝްފޯޑެވެ.

Ad by Hajj Corporation

މެޗުގެ ފުރަތަމަ ހާފު ނިމެން ކައިރިވެފައި ވަނިކޮށް، ޕެޑްރީ ތަނަވަސްކޮށްދިން ފުރުސަތަކުން ފާމިން ލޮޕޭޒް ވަނީ ބާސެލޯނާއަށް ކުރިހޯދައިދީފައެވެ. އޭނާ ފޮނުވާލި ބޯޅަ އަމާޒުވީ ގޯލުގެ ތިރީ ކަނަށެވެ. ދެވަނަ ހާފުގައި ގެޓާފޭގެ ވަރުގަދަ ޑިފެންސް ފޫއަޅުވާލަން ބާސެލޯނާއަށް އުނދަގޫތަކެއް ކުރިމަތިވި ނަމަވެސް، މެޗުގެ 74 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ރަޝްފޯޑް ވަނީ ދެވަނަ ލަނޑު ޖަހައިދީފައެވެ. މި ލަނޑު ޖެހުމަށް ފުރުސަތު ތަނަވަސްކޮށްދިނީ ރޮބަޓް ލެވަންޑޯސްކީއެވެ.

ލެވަންޑޯސްކީގެ އާ ރެކޯޑެއް

މި މެޗަކީ ބާސެލޯނާގެ ތަޖުރިބާކާރު ފޯވާޑް ރޮބަޓް ލެވަންޑޯސްކީއަށް ޚާއްސަ މެޗެކެވެ. އޭނާ ވަނީ ލަލީގާގައި 100 ލަނޑުގައި (81 ލަނޑާއި 19 އެސިސްޓް) ބައިވެރިވި އެންމެ ދުވަސްވީ ކުޅުންތެރިޔާގެ ރެކޯޑު ގާއިމްކޮށްފައެވެ. މި ރެކޯޑު އޭނާ ހެދީ 37 އަހަރާއި 247 ދުވަހުގައެވެ.

ތަފާސްހިސާބުތަކަށް ބަލާއިރު، ބާސެލޯނާއަކީ މި ސީޒަނުގައި ބަދަލު ކުޅުންތެރިންގެ އަތުން އެންމެ ގިނަ ލަނޑު ހޯދާފައިވާ އެއް ޓީމެވެ. އެގޮތުން ބަދަލު ކުޅުންތެރިން ވަނީ މިހާތަނަށް 17 ލަނޑު ޖަހައިދީފައެވެ. ޔޫރަޕްގެ ގަދަ ފަސް ލީގަށް ބަލާއިރު މި އަދަދަށްވުރެ ގިނައިން ލަނޑު ޖަހާފައިވަނީ ހަމައެކަނި ބަޔާން މިއުނިކް (18 ލަނޑު) އެވެ.

މެޗުގެ އިތުރު ވަގުތުގައި މާކް ކަސާޑޯއަށް ތިންވަނަ ލަނޑެއް ޖަހަން ރަނގަޅު ފުރުސަތެއް ލިބުނު ނަމަވެސް، އޭނާ ފޮނުވާލި ބޯޅަ ދިޔައީ ގޯލާ އަމާޒުނުވެ ބޭރަށެވެ. އެހެންނަމަވެސް، މުޅި މެޗުގައި ބާސެލޯނާއިން ވަނީ މޮޅު ކުޅުމެއް ދައްކައި، ލީގު ތަށި ހޯދުމާ ގާތަށް އިތުރު ފިޔަވަޅެއް އަޅާފައެވެ.