ވޮޝިންގޓަން ޑީސީގައި ބޭއްވި ވައިޓް ހައުސް ކޮރެސްޕޮންޑެންޓްސް ޑިނަރގެ ތެރޭގައި ބަޑީގެ ހަމަލާތަކެއް ދިނުމާ ގުޅިގެން އެކަކު ހައްޔަރުކޮށްފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ހޮނިހިރު ދުވަހު ވިދާޅުވެއްޖެއެވެ.

މި ހާދިސާ ހިނގާފައިވަނީ ވޮޝިންގޓަން ހިލްޓަން ހޮޓަލުގައި ބޭއްވި އަހަރީ ހަފްލާގެ ތެރޭގައެވެ.

Ad by Hajj Corporation

ރައީސް ޓްރަމްޕްގެ ސޯޝަލް މީޑިއާ ޕްލެޓްފޯމް ކަމަށްވާ 'ޓްރުތް ސޯޝަލް' ގައި ކުރެއްވި ޕޯސްޓެއްގައި ވިދާޅުވީ، ސީކްރެޓް ސާވިސް އާއި ގާނޫނު ތަންފީޒުކުރާ އިދާރާތަކުން ވަރަށް ހަލުވިކަމާއެކު އަދި ހިތްވަރުގަދަކަމާއެކު މަސައްކަތް ކޮށްފައިވާ ކަމަށެވެ. އަދި ބަޑިޖެހި މީހާ މިހާރު ހައްޔަރުކޮށްފައިވާ ކަމަށްވެސް ރައީސް ވިދާޅުވިއެވެ.

މި ހާދިސާ ހިނގުމާއެކު ރައީސް ޓްރަމްޕާއި އަނބިކަނބަލުން މެލަނިއާ ޓްރަމްޕް ވަނީ ވަގުތުން އެ ތަނުން ރައްކާތެރިކަމާއެކު ބޭރަށް ގެންގޮސްފައެވެ. ރައީސް ވިދާޅުވި ގޮތުގައި، ފަސްޓް ލޭޑީގެ އިތުރުން ނައިބު ރައީސް ޖޭޑީ ވެންސް އަދި ކެބިނެޓްގެ ހުރިހާ މެންބަރުންގެ ހާލުވެސް ރަނގަޅެވެ.

ސީކްރެޓް ސާވިސްއިން ނެރުނު ބަޔާނެއްގައި ބުނެފައިވަނީ އެކަކު ހައްޔަރުކޮށްފައިވާ ކަމަށާއި، ނަމަވެސް މި ހާދިސާގައި އަނިޔާވި މީހުންގެ ތަފްސީލެއް އަދި ލިބިފައިނުވާ ކަމަށެވެ. ކަމާބެހޭ އިދާރާތަކުން ދަނީ މިހާރު ހާލަތު އިތުރަށް ވަޒަންކުރަމުންނެވެ.

ޑިސްޓްރިކްޓް އޮފް ކޮލަމްބިއާގެ ޔޫއެސް އެޓާނީ ޖީނީން ޕިރޯ ސޯޝަލް މީޑިއާގައި ހިއްސާކުރި ވީޑިއޯއެއްގައި ވިދާޅުވީ، ބަޑިޖެހި އަޑު އިވުމާއެކު އޭނާ ހޯލުން ބޭރަށް ނެރެފައިވާ ކަމަށެވެ. އަދި މިހާރު ހޮޓަލުގެ ކަންކަން ބަލަހައްޓަމުން ދަނީ ސީކްރެޓް ސާވިސްއިން ކަމަށްވެސް އޭނާ ވިދާޅުވިއެވެ.

މި ހާދިސާއާ ގުޅިގެން މެދުކަނޑާލި ހަފްލާ ކުރިއަށް އޮތް 30 ދުވަހުގެ ތެރޭގައި އަލުން ބާއްވާނެ ކަމަށް ރައީސް ޓްރަމްޕް ވަނީ އިއުލާނު ކުރައްވާފައެވެ. ޑީސީގެ މޭޔަރު މުރިއަލް ބައުޒާ އާއި ޕޮލިސް ޗީފް ޖެފްރީ ކެރޯލް ވެސް މިހާރު ދަނީ ހާދިސާ ހިނގި ސަރަހައްދަށް ވަޑައިގަންނަވަމުންނެވެ.