ރަސްމާލެ މަޝްރޫޢަކީ ކުރިއަށް އޮތް 20 އަހަރަށް ޕްލޭންކޮށްގެން ސަރުކާރުން ކުރިއަށް ގެންދާ މަޝްރޫޢެއް ކަމަށް ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވަޒީރު ޢަބްދުﷲ މުއްޠަލިބް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި ގަލޮޅު ދެކުނު ދާއިރާގެ މެންބަރު މީކާއިލް ނަސީމް ކުރެއްވި ސުވާލަކަށް ޖަވާބުދެއްވަމުންނެވެ.

Ad by Hajj Corporation

އެ މަޝްރޫޢު ކުރިއަށް ގެންދިއުމާ އެހެން މަޝްރޫޢުތަކާ އެއްވެސް ގުޅުމެއް ނެތްކަން ފާހަގަކުރައްވާ ވަޒީރު ވިދާޅުވީ މިދިޔަ ސަރުކާރުން ވަނީ ހުޅުމާލެ ދެވަނަ ފިޔަވައްސާއި ތިންވަނަ ފިޔަވަހީގެ ހުރިހާ ބިމަކާއި، ގުޅީފަޅާއި ގިރާވަރުފަޅުން ވެސް ގޯތި ދޫކޮށްފައި ކަމަށެވެ. އެގޮތުން، ގިރާވަރުގެ 169 ހެކްޓަރުގެ ތެރެއިން 5,000 ގޯތި ނެގޭނެ ގޮތެއް ނުވިސްނޭ ކަމަށާއި މިހާރު މާލެ ސަރަޙައްދުގައި ރައްޔިތުންނަށް ބޭނުންވާ ފްލެޓް އެޅުމަށް ބޭނުންކުރާނެ އިތުރު ބިމެއް ވެސް ނެތްކަމަށް ވިދާޅުވިއެވެ.

މީގެއިތުރުން މުޅި ގްރޭޓަރ މާލެ ސަރަޙައްދުގައި ހުރި ހުރިހާ ތަނެއް އެއްކޮށްލައިގެން ވެސް އެންމެ ގިނަވެގެން އެޅޭނެ ކަމަށް ބެލެވެނީ 12,000 ފުލެޓް ކަމަށާއި ބޯހިޔާކަމުގެ ދަތިކަން ޙައްލުކުރުމަށްޓަކައި ކޮންމެ ވެސް އެހެން ގޮތެއް ވެސް ހޯދަންޖެހޭ ކަމަށް ވަޒީރު ވިދާޅުވިއެވެ.

އެހެންކަމުން ރަސްމާލެ މަޝްރޫޢަކީ މުސްތަޤުބަލަށްޓަކައި މި ވަގުތު ހިންގަން މަޖުބޫރު މަޝްރޫޢެއްގެ ގޮތުގައި ވަޒީރު ސިފަކުރެއްވިއެވެ.