މިނިވަން ނޫސްވެރިކަމުގެ ނަމުގައި ބައެއް ނޫސްވެރިން އެތައް ބައެއްގެ ބޮލުގައި ދޮގު އިލްޒާމް އަޅުވައި، މުޖުތަމަޢު ތެރޭގައި ނަފްރަތާއި ފަސާދަ އުފައްދަމުން ދާއިރު އެކަންކަން ބެލެން ވާނެ ކަމަށް ކުރީގެ ޚާރިޖީ ވަޒީރު ޑރ. ޢަބުދުﷲ ޚަލީލް ވިދާޅުވެއްޖެއެވެ.

ޚަލީލް މިހެން ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ދޮގު ތުހުމަތުތަކެއްކޮށް 'އަދަދު' ނޫހުން އާންމުކުރި ޑޮކިއުމަންޓްރީއަކާ ގުޅިގެން ފުލުހުން އެ ނޫހުގެ އޮފީސް ބަލައި ފާސްކޮށްފައިވާ ދަނޑިވަޅެއްގައެވެ.

Ad by Hajj Corporation

ރައީސް މުޢިއްޒަށް އަމާޒުކޮށް 'އައިޝާ' ގެ ނަމުގައި 'އަދަދު' ނޫހުން ދެއްކި ޑޮކިއުމަންޓްރީއާ ގުޅިގެން، ކޯޓު އަމުރެއްގެ ދަށުން ފުލުހުން ވަނީ ރޭ އެ ނޫހުގެ އޮފީސް ބަލައި ފާސްކޮށްފައެވެ. މީގެ އިތުރުން، އެ ނޫހުގެ ސީއީއޯ ހުސައިން ފިޔާޒް މޫސާގެ ޕާސްޕޯޓް ހިފަހައްޓައި، އޭނާ ރާއްޖެއިން ފުރުން ވެސް ވަނީ މަނާކޮށްފައެވެ.

މި މައްސަލައާ ގުޅިގެން އެކްސްގައި ކުރެއްވި ޕޯސްޓެއްގައި ޚަލީލް ވިދާޅުވީ، މިނިވަން ނޫސްވެރިކަމުގެ ނަމުގައި، ބައެއް ނޫސްވެރިން އެތައް ބައެއްގެ ބޮލުގައި ދޮގު އިލްޒާމް އަޅުވައި، މުޖުތަމަޢު ތެރޭގައި ނަފްރަތާއި ފަސާދަ އުފައްދަމުން ދާއިރު އެކަންކަން ބެލެން ވާނެ ކަމަށެވެ. އަދި މިފަދަ މަދު ނޫސްވެރިންގެ ސަބަބުން މުޖުތަމަޢުގައި އޮންނަންޖެހޭ އަދަބު އަޚްލާޤާއި އިތުބާރު ގެއްލި، މުޅި ނޫސްވެރިކަމުގެ ދާއިރާއަށް ހުތުރު ނަން އަމާޒުވާކަން އޭނާ ފާހަގަކުރެއްވިއެވެ.

ޚަލީލް އިތުރަށް ވިދާޅުވީ، ނޫސްވެރިކަމުގެ ދާއިރާގައި މިފަދަ ކަންކަން ދިމާވަނީ ރާއްޖޭގައި ނޫސްވެރިއަކަށް ވުމަށް އެއްވެސް މިންގަނޑެއް، ޝަރުތެއް ނުވަތަ ފުރިހަމަ ކުރަންޖެހޭ ތަމްރީނެއް ނެތުމުން ކަމަށް ދެކޭ ކަމަށެވެ. ދައުލަތުގެ ހަތަރުވަނަ ބާރުގެ ގޮތުގައި ނޫސްވެރިކަން އޮންނައިރު، އެ މަސައްކަތުގައި ތިބެންވާނީ އެކަށީގެންވާ ތަމްރީނު ލިބިފައިވާ އަދި ކަނޑައެޅޭ ޝަރުތުތަކެއް ފުރިހަމަވާ ހުނަރުވެރިން ކަމަށް އޭނާ ވިދާޅުވިއެވެ.

ޒިންމާދާރު އަދި މިނިވަން ނޫސްވެރިކަމަކީ ޤައުމުގެ އިޖްތިމާޢީ ފޭރާމުގެ މުހިންމު ބައެއްކަން ފާހަގަކުރައްވަމުން، ޚަލީލް ވަނީ ނޫސްވެރިކަމުގެ މިންގަނޑުތައް ހިފެހެއްޓުމުގެ މުހިންމުކަމަށް ބާރުއަޅުއްވާފައެވެ.