މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުން "ނޫސް މަޖައްލާ ރަޖިސްޓަރީކުރުމުގެ ގަވާއިދު" ގެ ނަމުގައި އައު ގަވާއިދެއް އެކުލަވައިލައި ސަރުކާރުގެ ގެޒެޓުގައި ޝާއިޢުކޮށްފިއެވެ.

މި ގަވާއިދަކީ ޤާނޫނު ނަންބަރު 2025/16 (މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ޤާނޫނު) ގެ 7 ވަނަ ބާބަށް ރިޢާޔަތްކޮށް، އެ ޤާނޫނުގެ 83 ވަނަ މާއްދާގެ (ހ) ގެ ދަށުން ބާރު ލިބިގެން އެކުލަވައިލައިފައިވާ ގަވާއިދެކެވެ. މި ގަވާއިދުގެ މަޤުޞަދަކީ ނޫސް މަޖައްލާ ރަޖިސްޓަރީކޮށް ޝާއިޢުކުރުމުގައި ޢަމަލުކުރަންވީ ހަމަތައް ދެފުށް ފެންނާނެ ގޮތަށް ބަޔާންކުރުމެވެ.

Ad by Hajj Corporation

ގަވާއިދުގައިވާ ގޮތުން ނޫސް މަޖައްލާގެ ޚިދުމަތްތައް ބެހިގެންވަނީ ނޫސް، މަޖައްލާ، ނިއުސް ލެޓަރ އަދި ޖާނަލް ހިމެނޭ ގޮތަށް 4 ބާވަތަށެވެ. އަދި ޚިދުމަތް ދިނުމަށް ބޭނުންކުރެވޭ ވަސީލަތްތައް ބެހިގެންވަނީ ޕްރިންޓް، ވެބްސައިޓް، ސޯޝަލް މީޑިއާ، އެޕްލިކޭޝަން އަދި އިލެކްޓްރޯނިކް މީޑިއާ ހިމެނޭ ގޮތަށް 5 ބައެއްގެ މައްޗަށެވެ.

މި ގަވާއިދުގައި ނޫސް މަޖައްލާ ރަޖިސްޓަރީ ކުރުމާއި، ރަޖިސްޓަރީގެ މުއްދަތާއި، ފީތަކާއި، ރަޖިސްޓަރީ އައުކުރުމާއި ބާޠިލުކުރުމުގެ އިތުރުން މަސްއޫލުވެރިޔާއާއި އެޑިޓަރުގެ ޝަރުޠުތަކާއި ޒިންމާތަކާއި ސުލޫކީ މިންގަނޑުތައް ވެސް ކަނޑައަޅައިފައިވެއެވެ. އަދި މި ޤާނޫނަށް ޢަމަލުކުރަން ފެށުމާއެކު، ދިވެހިރާއްޖޭގައި އެއްވެސް ނޫހެއް ނުވަތަ މަޖައްލާއެއް ޝާއިޢުކުރަންވާނީ ރަޖިސްޓަރީކޮށްގެން ކަމަށް ގަވާއިދުގައި ބަޔާންކޮށްފައިވެއެވެ.