ރެއާލް މެޑްރިޑްގެ ރައީސް ފްލޮރެންޓީނޯ ޕެރޭޒް، އެ ކްލަބުގެ ކުރީގެ ކޯޗު ހޯސޭ މޮރީނިއޯ އަލުން އަނބުރާ ގެނައުމަށް މަސައްކަތް ކުރައްވަމުންދާ ކަމަށް މަޝްހޫރު ކުޅިވަރު ނޫސްވެރިޔާ ޑޭވިޑް އޯންސްޓީން ރިޕޯޓްކޮށްފިއެވެ. މި ބަދަލު ގެނައުމަށް ނިންމާފައިވަނީ މިހާރުގެ ކޯޗު އަލްވާރޯ އާބެލޯއާގެ ބަދަލުގައެވެ.

ކުރީގެ ކޯޗު ޒަބީ އޮލޮންސޯ މަގާމުން ވަކިކުރުމާ ގުޅިގެން، މިދިޔަ ޖެނުއަރީ މަހު ޓީމާ ހަވާލުވި އާބެލޯއާ، މި ސީޒަން ނިމުމުން މަގާމުން ވަކިވާނެ ކަމަށް ބެލެވެއެވެ. މިހާރު ޕެރޭޒް އިސްވެ ހުންނަވައިގެން ގެންދަވަނީ އާބެލޯއާގެ ބަދަލުގައި ޓީމާ ހަވާލުވާނެ އާ ކޯޗެއް ހޯދުމުގެ މަސައްކަތް ކުރައްވަމުންނެވެ.

Ad by Hajj Corporation

ރިޕޯޓްތައް ބުނާ ގޮތުގައި، ބޮޑެތި ކާމިޔާބީތަކެއް ނުލިބި ދިޔަ މާޔޫސީ ދުވަސްތަކަށްފަހު، ޓީމު އަލުން ބިނާކުރުމަށް ޕެރޭޒް އެންމެ އިސްކަންދޭ ކެންޑިޑޭޓަކީ މޮރީނިއޯއެވެ. ކްލަބުގެ އެތެރޭގެ ބައެއް ފަރާތްތަކުން މި ނިންމުމާ ދެކޮޅު ހެދި ނަމަވެސް، ޕެރޭޒް ގަބޫލުކުރައްވަނީ މޮރީނިއޯއަކީ މި ވަގުތަށް އެންމެ އެކަށީގެންވާ ކޯޗު ކަމަށެވެ.

މޮރީނިއޯ އަލުން ރެއާލް މެޑްރިޑާ ގުޅިއްޖެނަމަ، މިއީ އޭނާ ޕެރޭޒްގެ ރައީސްކަމުގެ ދަށުން އެ ކްލަބަށް ކޯޗުކޮށްދޭ ދެވަނަ ފަހަރަށް ވާނެއެވެ. މީގެ ކުރިން މޮރީނިއޯ އެ ކްލަބުގައި ހޭދަކުރި ދުވަސްވަރު ވަނީ ލަގީގާގެ ރެކޯޑް މާކްސްއަކާއެކު ތަށި ހޯދައިދީ، ގިނަ ކާމިޔާބީތަކެއް ހޯދައިދީފައެވެ.