ސިޔާސީ ޕާޓީއަކުން މެމްބަރަކު ވަކިކުރުމުން ރައްޔިތުންގެ މަޖިލީހުގެ ގޮނޑި ގެއްލުވައިލެވޭ ގޮތަށް ގާނޫނުއަސާސީއަށް ގެނައި އިސްލާހު ގާނޫނުއަސާސީގެ އޮނިގަނޑާ ހިލާފު ނުވާ ކަމަށާއި އެ އިސްލާހު ބާތިލްކުރަން ޖެހޭ ސަބަބެއް ނެތް ކަމަށް ސުޕްރީމް ކޯޓުން މިއަދު ހުކުމްކޮށްފިއެވެ.

މި މައްސަލައަކީ ގާނޫނުއަސާސީގެ އަސާސީ އޮނިގަނޑާ ހިލާފު އިސްލާހެއް ކަމަށް ބުނެ ކުރީގެ މަޖިލިސް މެންބަރު އަލީ ހުސައިން ހުށަހެޅުއްވި މައްސަލައެކެވެ.

Ad by Hajj Corporation

ސުޕްރީމް ކޯޓުގެ ހަތް ފަނޑިޔާރުންގެ ފުރިހަމަ ބެންޗުން ބެލި މި މައްސަލާގައި، މިއަދު ހުކުމްކުރީ ގާނޫނުއަސާސީއަށް ގެންނަ އިސްލާހުތަކުގެ މައްސަލަތައް ބެލުމުގެ އިހުތިސޯސް ސުޕްރީމް ކޯޓަށް ލިބިގެންވާ ކަމަށެވެ. ނަމަވެސް، މިހާރު ހުށަހަޅާފައިވާ އިސްލާހަކީ ބާތިލްކުރަން ޖެހޭ ފަދަ ގާނޫނީ ސަބަބެއް އޮތް އިސްލާހެއް ނޫން ކަމަށް ފަނޑިޔާރުންގެ އަގުލަބިއްޔަތުން ވަނީ ކަނޑައަޅުއްވާފައެވެ.

މި މައްސަލާގައި އަލީ ހުސައިން ފާހަގަކުރައްވާފައިވަނީ މި އިސްލާހަކީ ގާނޫނުއަސާސީގެ 4، 8، 26، 75 އަދި 90 ވަނަ މާއްދާއާ ހިލާފު އިސްލާހެއް ކަމަށެވެ. އޭގެ ތެރޭގައި ދައުލަތުގެ ބާރުތައް ރައްޔިތުންގެ ކިބައިން ފެށިގެން އައުމާއި، އިންތިހާބުތަކަށް ކުރިމަތިލުމުގެ ހައްގާއި، މަޖިލިސް މެންބަރުން ގައުމީ މަސްލަހަތު އިސްކުރަންޖެހޭ މާއްދާތައް ހިމެނެއެވެ. އަދި 90 ވަނަ މާއްދާގައި ބުނާ މެންބަރަކު ދައްކާ ވާހަކައަކަށް ނުވަތަ ވޯޓަކަށް ފިޔަވަޅު ނޭޅޭނެ ކަމަށް ބުނާ އުސޫލާ ވެސް މި އިސްލާހު ފުށުއަރާ ކަމަށް އޭނާ ވަނީ ފާހަގަކުރައްވާފައެވެ.

މި މައްސަލާގައި ހުކުމް ނެރުއްވީ ފަސް ފަނޑިޔާރުންގެ އަގުލަބިއްޔަތުންނެވެ. އަގުލަބިއްޔަތު ލިބުނު ރައުޔު އިއްވެވީ އުއްތަމަ ފަނޑިޔާރު އަބްދުލްގަނީ މުހައްމަދު އެވެ. މި ރައުޔަށް ފަނޑިޔާރު އަލީ ރަޝީދު ހުސައިނާއި، ފަނޑިޔާރު ހުސައިން ޝަހީދާއި، ފަނޑިޔާރު އަބްދުﷲ ހަމީދު ވަނީ ތާއީދުކުރައްވާފައެވެ. ފަނޑިޔާރު ޑރ. މުހައްމަދު އިބްރާހީމްގެ ރައުޔަކީ އިސްލާމް ދީނުގެ މަސްދަރަކާ ހިލާފުނުވާ ނަމަ ގާނޫނުއަސާސީއަށް ގެންނަ ކޮންމެ އިސްލާހަކީ ގާނޫނުއަސާސީގެ ބައެއް ކަމަށެވެ.

މި މައްސަލާގައި ތަފާތު ރައުޔެއް ނެރުއްވީ ފަނޑިޔާރު އައިޝާ ޝުޖޫން މުހައްމަދު އެކަންޏެވެ. އެކަމަނާގެ ރައުޔަކީ މި އިސްލާހަކީ ބާތިލްކުރަންޖެހޭ އިސްލާހެއް ކަމަށެވެ. ނަމަވެސް ބެންޗުގެ އަގުލަބިއްޔަތު ރައުޔަށް ރިއާޔަތްކޮށް، ކޯޓުން ނިންމީ ގާނޫނުއަސާސީއަށް ގެނައި އެ އިސްލާހު ދެމިއޮންނާނެ ކަމަށެވެ.