ސައުދީ ޕްރޯ ލީގުގައި ރޭގައި އޭޝިއަން ޗެންޕިއަންސްލީގުގެ މިސީޒަނުގެ ޗެންޕިއަން އަލް-އަހްލީ 2-0 އިން ބަލިކޮށް، ތާވަލުގެ އެއްވަނައިގައި އޮތް އަލް-ނަސްރުން ލީގު ތަށި ހޯދުމާ ގާތަށް ޖެހިލައިފިއެވެ. މި މޮޅާއެކު އަލް-ނަސްރު މިހާރު އޮތީ ދެވަނައިގައި އޮތް އަލް-ހިލާލަށް ވުރެ އަށް ޕޮއިންޓު ކުރީގައެވެ.

އަލް-އައްވަލް ޕާކުގައި ކުޅުނު މި މެޗުގެ ފުރަތަމަ ހާފުގައި ދެ ޓީމަށްވެސް ލަނޑު ޖަހާނެ ރަނގަޅު ފުރުސަތުތަކެއް ލިބުނެވެ. އެގޮތުން މެޗުގެ 13 ވަނަ މިނެޓުގައި އަލް-އަހްލީގެ މެރިހް ޑެމިރަލް ބޮލުން ފޮނުވާލި ހަމަލާއެއް އަލް-ނަސްރުގެ ކީޕަރު ބެންޓޯ ވަނީ ހުޝިޔާރުކަމާއެކު ދިފާއުކޮށްފައެވެ. ދެވަނަ ހާފު ފެށިގެން މާގިނަ އިރުތަކެއްނުވެ އަލް-އަހްލީގެ ރިޔާދު މަހްރޭޒް ލަނޑެއް ޖެހި ނަމަވެސް، ވީއޭއާރުން ނިންމީ އެއީ އޮފްސައިޑް ލަނޑެއް ކަމަށެވެ.

Ad by Hajj Corporation

މެޗުގެ ފުރަތަމަ ލަނޑު ޖަހައި އަލް-ނަސްރަށް ކުރިހޯދައިދިނީ އުމުރުން 41 އަހަރުގެ ކްރިސްޓިއާނޯ ރޮނާލްޑޯ އެވެ. މެޗުގެ 76 ވަނަ މިނެޓުގައި ޔާއޯ ފެލިކްސް ނަގައިދިން ހުރަހެއް ބޮލުން ގޯލުގެ ތެރެއަށް ފޮނުވާލައިގެން ރޮނާލްޑޯ މި ލަނޑު ކާމިޔާބުކުރިއިރު، މިއީ އޭނާ މި ސީޒަނުގައި ދައްކަމުންދާ މޮޅު ކުޅުމުގެ އިތުރު ހެކިބަހެކެވެ. އަލް-ނަސްރުގެ ދެވަނަ ލަނޑު މެޗުގެ 90 ވަނަ މިނެޓުގައި ކާމިޔާބުކޮށްދިނީ ކިންގްސްލީ ކޯމަން އެވެ.

މި މެޗުގައި އަލް-ނަސްރުގެ ޑިފެންސްލައިނުން ވަނީ ވަރަށް ވަރުގަދަ ކުޅުމެއް ދައްކާފައެވެ. މި ސީޒަނުގެ ލީގުގައި އަލް-ނަސްރުން މިހާތަނަށް 17 މެޗުގައި ބައިކޮޅަށް ލަނޑެއް ވަނަނުދީ ހިފަހައްޓާފައިވާއިރު، މިއީ އެ ކްލަބުގެ ތާރީޚުގައިވެސް އެއް ސީޒަނެއްގައި އެންމެ ގިނަ ކްލީން ޝީޓް ހަމަކުރި ފަހަރެވެ. މީގެ އިތުރުން އަމިއްލަ ދަނޑުގައި ބައިކޮޅަށް ލަނޑެއް ވަނަނުދީ އަށް މެޗު ނިންމާލުމަކީވެސް އެ ޓީމުން ގާއިމުކުރި އާ ރެކޯޑެކެވެ.

މެޗަށްފަހު ތަފާސްހިސާބުތަކަށް ބަލާއިރު، ޔާއޯ ފެލިކްސްގެ ދައުރު މި މޮޅުގައި ބޮޑެވެ. އޭނާ ވަނީ މުޅި މެޗުގައި ލަނޑު ޖަހާނެ އެންމެ ގިނަ ފުރުސަތު (ތިން ފުރުސަތު) ތަނަވަސްކޮށްދީފައެވެ. މި ނަތީޖާއާއެކު އަލް-ނަސްރު އެއްވަނައިގައި އޮތީ 13 ޕޮއިންޓުގެ ފަރަގަކާއެކު ތިންވަނައިގައި އޮތް އަލް-އަހްލީއަށް ވުރެ މާ ކުރީގައެވެ. ނަމަވެސް އަލް-ހިލާލް އާއި އަލް-އަހްލީއަށްވެސް އަދި އިތުރު އެއް މެޗު އަތުގައި އެބައޮތެވެ.