އިނގިރޭސިވިލާތުގެ ރަސްގެފާނު ކިންގް ޗާލްސް ތިންވަނަ ނިއުޔޯކް ސިޓީއަށް ކުރައްވާ ޒިޔާރަތުގެ ތެރެއިން، އިނގިރޭސި ޝާހީ އާއިލާގެ ތާޖުގައި އިންނަ އަގުބޮޑު ކޯހިނޫރު އަލިމަސް އަނބުރާ ދިނުމަށް އެދިވަޑައިގަންނަވަން ބޭނުންފުޅުވާ ކަމަށް މޭޔަރު ޒޮހްރާން މަމްދާނީ ވިދާޅުވެއްޖެއެވެ.

ނިއުޔޯކްގެ 9/11 މެމޯރިއަލް އެންޑް މިއުޒިއަމްގައި ބާއްވާ މާބޮކެޓް ބޭއްވުމުގެ ރަސްމިއްޔާތުގައި ރަސްގެފާނާއެކު ބައިވެރިވެވަޑައިގަންނަވަން ހަމަޖެހިފައިވާ މަމްދާނީ ނޫސްވެރިންނަށް މައުލޫމާތު ދެއްވަމުން ވިދާޅުވީ، ރަސްގެފާނާ ވާހަކަ ދައްކާލުމުގެ ފުރުސަތެއް ލިބިވަޑައިގެންފިނަމަ 100 ކެރަޓްގެ މި އަލިމަސް އަނބުރާ ދިނުމަށް ބާރުއަޅުއްވާނެ ކަމަށެވެ. 

Ad by Hajj Corporation

"އަޅުގަނޑަށް ރަސްގެފާނާ ވާހަކަ ދައްކާލުމުގެ ފުރުސަތު ލިބިއްޖެނަމަ... އަޅުގަނޑު ބޮޑަށް ބާރުއަޅާނީ ކޯހިނޫރު އަލިމަސް އަނބުރާ ދެއްވުމަށް،" ބްރޮންކްސްގައި ބޭއްވި ނޫސްވެރިންގެ ބައްދަލުވުމެއްގައި މަމްދާނީ ވިދާޅުވިއެވެ.

ކޯހިނޫރު އަލިމަހަކީ ގާތްގަނޑަކަށް 1 ބިލިއަން ޑޮލަރުގެ އަގުހުރި އެއްޗެއް ކަމަށް އަންދާޒާ ކުރެވޭއިރު، މިއީ އެތައް އަހަރެއް ވަންދެން އިނގިރޭސި ޝާހީ އާއިލާގެ ތާޖުތަކުގައި ބޭނުންކުރަމުން އަންނަ އެއްޗެކެވެ. މީގެ ކުރިން މި އަލިމަސް ބޭނުންކޮށްފައިވަނީ ރާނީ އެލިޒަބަތު ދެވަނަގެ ތާޖުގައެވެ.

މި އަލިމަހުގެ މިލްކުވެރިކަމާ މެދު އިންޑިއާ، ޕާކިސްތާން، އީރާން އަދި އަފްޣާނިސްތާނުން ދަނީ ދައުވާ ކުރަމުންނެވެ. ވަކިން ހާއްސަކޮށް، 2022 ވަނަ އަހަރު ރާނީ އެލިޒަބަތު އަވަހާރަވުމާ ގުޅިގެން، އެ އަލިމަސް އަނބުރާ ހޯދުމަށް އިންޑިއާ ސަރުކާރުން ކުރަމުންދާ މަސައްކަތްތައް ވަނީ އަލުން ވަރުގަދަކޮށްފައެވެ.