އުޖާލާ ދިވެހިރާއްޖެއެއް ބިނާކުރުމަށްޓަކައި ރާއްޖޭގެ މަސައްކަތްތެރިން ކުރަމުންދާ މިންނެތް މަސައްކަތާއި ވަމުންދާ ގުރުބާނީގެ އަގު ވަޒަންކުރައްވައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަނބިކަނބަލުން މެޑަމް ސާޖިދާ މުހައްމަދު ޝުކުރު އަދާކުރައްވައިފިއެވެ.

ބައިނަލްއަގުވާމީ މަސައްކަތްތެރިންގެ ދުވަހުގެ މުނާސަބަތުގައި މެޑަމް ސާޖިދާ އެކްސްގައި ހިއްސާކުރި ޕޯސްޓެއްގައި ވިދާޅުވީ، ދިވެހި ގައުމުގެ ތަރައްގީއަށްޓަކައި މަސައްކަތްތެރިން ކުރައްވާ މިންނެތް މަސައްކަތާއި ގުރުބާނީގެ އަގު ވަޒަންކޮށް، މިއަދާއި އަދި އަބަދުވެސް އެ ފަރާތްތަކުން ދައްކަވަމުންދާ ހިތްވަރުގަދަ ނަމޫނާ ސަރުކާރާއި ރައްޔިތުން ފާހަގަކުރާ ކަމަށެވެ.

Ad by Hajj Corporation

"އުޖާލާ ދިވެހިރާއްޖެއެއް ބިނާކުރުމަށް ތިޔަ ކުރައްވާ މަސައްކަތަށްޓަކައި ޝުކުރު ދަންނަވަަމެވެ!" މެޑަމް ސާޖިދާ ވިދާޅުވި އެވެ.

މީގެ އިތުރުން މިއަދުގެ މުނާސަބަތުގައި ރައީސުލްޖުމްހޫރިއްޔާ ޑރ މުހައްމަދު މުއިއްޒު ވެސް ވަނީ ދުވަހުގެ ތަހުނިޔާ އަރިސްކޮށްފައެވެ. އެގޮތުން ރައީސްގެ މެސެޖުގައި ވިދާޅުވީ، އަމިއްލަ ނަފްސާއި ޢާއިލާގެ ފުދުންތެރިކަމަށްޓަކައި، އަދި ޤައުމުގެ ލާބައާއި މަންފާއަށްޓަކައި ކޮންމެ ދާއިރާއެއްގައި ބުރައުފުލާ މަސައްކަތްތެރިއަކީ ވެސް ޝަރަފްވެރިއެއް ކަމަށެވެ. އަދި އެއީ މި ޤައުމުން އަގުވަޒަން ކުރާނެ ޚިދުމަތްތެރިއެއްކަން ވެސް އެމަނިކުފާނު ފާހަގަކުރެއްވި އެވެ.

ބައިނަލްއަގުވާމީ މަސައްކަތްތެރިންގެ ދުވަހުގެ ގޮތުގައި ކޮންމެ އަހަރަކު ފާހަގަކުރަމުންދާ މެއި މަހުގެ އެއް ވަނަ ދުވަހަކީ، ރާއްޖޭގައި ރަސްމީ ބަންދު ދުވަހެއް ކަމުގައި ހަމަޖައްސާފައިވަނީ2011 ވަނަ އަހަރު، ކުރީގެ ރައީސުލްޖުމްހޫރިއްޔާ މުހަންމަދު ނަޝީދުގެ ދައުރުގައެވެ.