އެސްޓީއޯ ގްރޫޕްގެ 2025 ވަނަ އަހަރުގެ އަހަރީ ހިސާބުތައް އާންމުކޮށްފައިވާ އިރު، ޓެކުހަށް ކެނޑުމަށްފަހު ސާފު ފައިދާގެ ގޮތުގައި އެ ގްރޫޕަށް 785 މިލިއަން ރުފިޔާ ލިބިފައިވާ ކަމަށް އެ ކުންފުނިން ހާމަކޮށްފިއެވެ.

Ad by Hajj Corporation

އެ ކުންފުނިން ބުނި ގޮތުގައި 2025 ވަނަ އަހަރުގެ ޖުމްލަ އާމްދަނީގެ ގޮތުގައި 16.68 ބިލިއަން ރުފިޔާ ލިބިފައިވެއެވެ. މިއީ ކުރީ އަހަރާ އަޅައިބަލާ އިރު 0.5 އިންސައްތައިގެ ދަށްވުމެކެވެ. އާމްދަނީ ދަށްވި މައިގަނޑު ސަބަބަކީ ދުނިޔޭގެ ބާޒާރުގައި ތެލުގެ އަގު ދަށްވުމާއި ޝިޕިންގ ވިޔަފާރިން ލިބުނު އާމްދަނީ ދަށްވުން ކަމަށް އެ ކުންފުނިން ބުންޏެވެ.

ނަމަވެސް ތެޔޮ ވިކުނު އަދަދު 8 އިންސައްތައިން އިތުރުވެފައިވާ އިރު، އިންޝޫރަންސް، ގޭސް އަދި ޓްރޭޑިންގ ވިޔަފާރި ވެސް ރަނގަޅުވެފައިވާ ކަމަށް އެ ކުންފުނިން ފާހަގަކުރިއެވެ.

އެސްޓީއޯ ގްރޫޕްގެ ހިންގުމުގެ ފައިދާގެ ގޮތުގައި 1.18 ބިލިއަން ރުފިޔާ ލިބިފައިވާ ކަމަށާއި، ފައިނޭންސް ކުރުމުގެ ހަރަދު 16 އިންސައްތައިން ދަށްވުމާ އެކު ޓެކުހުގެ ކުރިން ސާފު ފައިދާގެ ގޮތުގައި 962 މިލިއަން ރުފިޔާ ލިބިފައިވާ ކަމަށް އެ ކުންފުނިން ބުންޏެވެ. މިއީ ކުރީ އަހަރާ އަޅައިބަލާ އިރު 4 އިންސައްތައިގެ ކުރިއެރުމެކެވެ.

ޓެކުހަށް ކެނޑުމަށްފަހު ލިބުނު 785 މިލިއަން ރުފިޔާ އަކީ ކުރީ އަހަރާ އަޅައިބަލާ އިރު 2 އިންސައްތައިގެ ކުރިއެރުމެއް ކަމަށް ވެސް އެ ކުންފުނިން ހާމަކުރިއެވެ.