މިދިޔަ ފެބްރުއަރީ މަހު ފެށި މެދުއިރުމަތީ ހަނގުރާމައިގެ ސަބަބުން އެމެރިކާ އަސްކަރިއްޔާގެ 2.3 ބިލިޔަން ޑޮލަރާއި 2.8 ބިލިޔަން ޑޮލަރާ ދެމެދުގެ އަގުހުރި އަސްކަރީ ސާމާނަށް ގެއްލުން ލިބިފައިވާ ކަމަށް ދިރާސާއަކުން ދައްކައިފިއެވެ.

ސެންޓަރ ފޮރ ސްޓްރެޓީޖިކް އެންޑް އިންޓަނޭޝަނަލް ސްޓަޑީޒް (ސީއެސްއައިއެސް) ގެ މުޝީރު މާކް ކަންސިއަން ތައްޔާރުކުރެއްވި މި ދިރާސާގައި ފާހަގަކުރައްވާފައިވާ ގޮތުގައި އެ އަދަދަކީ ހަމައެކަނި އަސްކަރީ ސާމާނަށް ލިބުނު ގެއްލުމުގެ އަގެވެ. އެމެރިކާގެ އަސްކަރީ މަރުކަޒުތަކަށާއި ޚާއްސަ އިކުއިޕްމަންޓަށާއި ކަނޑުގެ އެސެޓްތަކަށް ލިބުނު ގެއްލުން ހިމެނޭ ނަމަ ޖުމްލަ އަދަދު އެއަށްވުރެ އެތައް ގުނައެއް އިތުރުވާނެ ކަމަށް ދިރާސާގައި ބުނެފައިވެއެވެ.

Ad by Hajj Corporation

އެންމެ ބޮޑެތި ގެއްލުންތަކުގެ ތެރޭގައި މާރިޗު 27 ގައި ސައުދީ އަރަބިއްޔާގެ ޕްރިންސް ސުލްތާން ވައިގެ މަރުކަޒަށް އީރާނުން ދިން ހަމަލާގައި 700 މިލިޔަން ޑޮލަރުގެ ރާޑަރު މަތިންދާބޯޓެއް ސުންނާފަތިވުމާއި، މާރިޗު 1 ގައި ތާޑް މިސައިލް ދިފާއީ ނިޒާމުގެ ރާޑަރަކަށް ލިބުނު 485 މިލިޔަން ޑޮލަރާއި 970 މިލިޔަން ޑޮލަރާ ދެމެދުގެ ގެއްލުން ހިމެނޭ ކަމަށް އެ ދިރާސާއިން ދައްކައެވެ. މީގެ އިތުރުން ކުވައިތުގެ އަސްކަރިއްޔާއިން އޮޅުމަކުން އެމެރިކާގެ ތިން ފައިޓަރ ޖެޓް ވައްޓާލާފައިވާ ކަމަށް ވެސް ދިރާސާގައި ބަޔާންކޮށްފައިވެއެވެ.

ދައުހާ އިންސްޓިޓިއުޓް ފޮރ ގްރެޖުއޭޓް ސްޓަޑީޒްގެ މުޝީރު އުމަރު އާޝޫރު ވިދާޅުވި ގޮތުގައި ގެއްލުމުގެ ފުރިހަމަ މައުލޫމާތު ސިޔާސީ ސަބަބުތަކަށްޓަކައި އެމެރިކާއިން ހާމަ ނުކުރާނެއެވެ. އެ މައުލޫމާތު ހާމަކޮށްފި ނަމަ ނޮވެމްބަރުގައި ބާއްވާ މެދު ދައުރުގެ އިންތިޚާބަށް ނޭދެވޭ އަސަރެއް ކޮށްފާނެ ކަމަށް އޭނާ ވިދާޅުވިއެވެ.