އިރާނުން ބަންދުކޮށްފައިވާ ހޯރްމޫޒް ކަނޑުއޮޅި އަލުން ހުޅުވައި، އެ ސަރަހައްދުން ދަތުރުކުރާ އުޅަނދުފަހަރަށް ރައްކާތެރިކަން ކަށަވަރުކުރުމަށްޓަކައި އެކުވެރި ގައުމުތަކުގެ އެހީތެރިކަމަށް އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން އެދިއްޖެއެވެ. މީގެ ކުރިން ޓްރަމްޕް ވިދާޅުވެފައިވަނީ މިކަމުގައި އެހެން ގައުމެއްގެ އެހީތެރިކަން ބޭނުންނުވާ ކަމަށެވެ.

އެންބީސީ ނިއުސްއަށް ލިބިފައިވާ ސްޓޭޓް ޑިޕާޓްމަންޓުގެ އެތެރޭގެ މެމޯއެއްގައިވާ ގޮތުން، ޕެންޓަގަންއާ ގުޅިގެން "މެރިޓައިމް ފްރީޑަމް ކޮންސްޓްރަކްޓް" ގެ ނަމުގައި އާ އިއްތިހާދެއް އުފެއްދުމަށް ދަނީ މަސައްކަތް ކުރަމުންނެވެ. މި އިއްތިހާދުގެ މަގްސަދަކީ ބައިވެރިވާ ގައުމުތަކުގެ މެދުގައި މައުލޫމާތު ހިއްސާކުރުމާއި، އިރާނާ ދެކޮޅަށް ހިންގާ ޑިޕްލޮމެޓިކް އަދި އިގްތިސާދީ ފިޔަވަޅުތައް ވިލަރެސްކުރުމެވެ.

Ad by Hajj Corporation

މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާއާއި އިސްރާއީލުން ބޮން އެޅުމުގެ ކެމްޕޭނެއް ފެށުމާ ގުޅިގެން އިރާނުން ވަނީ ހޯރްމޫޒް ކަނޑުއޮޅި ބަންދުކޮށްފައެވެ. މީގެ ސަބަބުން ދުނިޔޭގެ ބާޒާރުގައި ތެލުގެ އަގު ފާއިތުވި ހަތަރު އަހަރު ތެރޭގައި ނުއުފުލޭ މިންވަރަށް ވަނީ މައްޗަށް ގޮސްފައެވެ. މީގެ އިތުރުން، އެމެރިކާގެ ރައީސްގެ މަގްބޫލުކަންވެސް މިކަމާ ގުޅިގެން ދަށަށް ގޮސްފައިވާ ކަމަށް ދާދި ފަހުން ނެގި ހިޔާލު ހޯދުމުގެ ވޯޓުތަކުން ދައްކައެވެ.

މި މައްސަލައިގައި އެމެރިކާގެ އެކުވެރި ނޭޓޯގެ ގައުމުތަކުން ހަނގުރާމައިގައި ބައިވެރިވުމަށް ފަސްޖެހެމުންދާތީ، ރައީސް ޓްރަމްޕް ވަނީ އެ ގައުމުތަކަށް ވަރަށް ބޮޑަށް ފާޑުވިދާޅުވެފައެވެ. ޖަރުމަނުގެ ޗާންސެލަރު ފްރީޑްރިކް މާޒް، އެމެރިކާގެ އެއްވެސް ސްޓްރެޓެޖީއެއް ނެތް ކަމަށް ވިދާޅުވުމާ ގުޅިގެން، ޖަރުމަނުގައި ތިބި އެމެރިކާ ސިފައިން ބާލާނެ ކަމުގެ އިންޒާރު ޓްރަމްޕް ވަނީ ދެއްވާފައެވެ. އަދި އިޓަލީއާއި ސްޕެއިންއިންވެސް އެހީތެރިކަން ނުލިބޭ ކަމަށް ވިދާޅުވެ، އެ ގައުމުތަކުންވެސް ސިފައިން ބޭލުމުގެ އިޝާރާތެއް ޓްރަމްޕް ވަނީ ކުރައްވާފައެވެ.

އޭޕްރީލް 8 ވަނަ ދުވަހުން ފެށިގެން ވަގުތީ ގޮތުން ހަމަލާ ބަދަލުކުރުން ހުއްޓާލާފައި އޮތް ނަމަވެސް، މަޝްވަރާތަކުން އަދި އެދެވޭ ނަތީޖާއެއް ނުފެނެއެވެ. އެމެރިކާއިން ވަނީ އިރާނުގެ ބައެއް ބަނދަރުތައް ބްލޮކްކޮށް، މަދުވެގެން 41 އުޅަނދެއް ހުއްޓުވާފައެވެ. ކުރިއަށް އޮތް މެއި މަހުގެ މެދުތެރޭގައި ޓްރަމްޕް ޗައިނާއަށް ކުރައްވާ ދަތުރުފުޅަކީ މި މައްސަލައިގައި ވަރަށް މުހިންމު ދަތުރުފުޅަކަށް ވާނެ ކަމަށް ވައިޓް ހައުސްއިން ގަބޫލުކުރެއެވެ.