ވަކި ފަރާތަކަށް ނުޖެހި ޒިންމާދާރުކަމާއެކު ނޫސްވެރިކަން ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުރިހާ ނޫސްވެރިންނަށް އިލްތިމާސްކުރައްވައިފިއެވެ.

މިއަދު ފާހަގަކުރަމުންދާ ނޫސްވެރިކަމުގެ މިނިވަންކަމުގެ ދުވަހުގެ މުނާސަބަތުގައި، ރައީސުލްޖުމްހޫރިއްޔާ އެކްސްގައި ކުރެއްވި ޕޯސްޓެއްގައި ވިދާޅުވީ، ނޫސްވެރިކަމުގެ މިނިވަންކަމުގެ ބޭނުން ހިފުމުގައި، ސައްހަ، ވަކި ފަރާތަކަށް ނުޖެހޭ، އަދި ނޫސްވެރިކަމުގެ އަޚްލާގީ މިންގަނޑުތަކަށް ބޯލަނބައި، ޒިންމާދާރުކަމާއެކު މައުލޫމާތު ފެތުރުމަކީ ނުހަނު ބޭނުންތެރި ކަމެއް ކަމަށެވެ.

Ad by Hajj Corporation

މީޑިއާގެ ދާއިރާ ކުރިއެރުވުމަށް ސަރުކާރުން ކުރަމުންދާ މަސައްކަތްތަކަށް އަލިއަޅުއްވާލައްވަމުން ރައީސް ވިދާޅުވީ، މި ދާއިރާއަށް އިންވެސްޓްކުރުމާއި، މަޢުލޫމާތު ހޯދައި ލިބިގަތުމުގެ ފުރުޞަތު ފުޅާކުރުމުގެ އިތުރުން، އާންމު މަޝްވަރާތަކަށް މަގުފަހިކޮށްދިނުމުގެ ތެރެއިން، ނޫސްވެރިކަމަށް ފަހި މާހައުލެއް ބިނާކުރުމަށް ސަރުކާރުން ކުރަމުންދާ މަސައްކަތްތައް ހަރުދަނާކުރަމުންދާ ކަމަށެވެ. މި މަސައްކަތްތަކަކީ ދައުލަތުގެ މުއައްސަސާތަކަށް އޮންނަ އިތުބާރު ދެމެހެއްޓުމަށާއި، ރައްޔިތުންގެ ބައިވެރިވުން އިތުރުކުރުމުގެ އިތުރުން، ދެފުށް ފެންނަ، ޒިންމާދާރު ނިޒާމެއް ބިނާކުރުމަށް ކޮންމެހެން ބޭނުންތެރި ކަންކަން ކަމުގައި އެމަނިކުފާނު ފާހަގަކުރެއްވިއެވެ.

މީގެ އިތުރުން، ނޫސްވެރިން ދައްކުވައިދޭ ފަންނީ ގާބިލުކަމާއި، ކެރުންތެރިކަމުގެ އިތުރުން، އަމާނާތްތެރިކަމާއެކު އާންމު މަސްލަހަތު އިސްކޮށް ކުރަމުންދާ ޚިދުމަތްތަކުގެ އަގު ސަރުކާރުން ވަޒަންކުރާކަމަށްވެސް ރައީސް މުޢިއްޒު ވިދާޅުވިއެވެ.

ރާއްޖޭގެ ނޫސްވެރިކަމުގެ ދާއިރާ ހަރުދަނާކޮށް، ނޫސްވެރިންނަށް ބޭނުންވާ ތަމްރީނާއި ވަސީލަތްތައް މަގުފަހިކޮށްދިނުމަކީ ސަރުކާރުގެ މުހިންމު ސިޔާސަތެކެވެ.