ސައުދީ ޕްރޯ ލީގުގައި މެދުނުކެނޑި 16 މެޗުން މޮޅުވެ، ތާވަލުގެ އެއްވަނައިގައި އޮތް އަލް ނަސްރު، އަލް ގާދިސިއްޔާ އަތުން 3-1 އިން ބަލިވެއްޖެއެވެ. މިއީ ވޭތުވެދިޔަ 17 މެޗުގެ ތެރޭގައި އެ ޓީމު ބަލިވި ފުރަތަމަ ފަހަރެވެ.

ޕްރިންސް މުހައްމަދު ބިން ފަހުދު ސްޓޭޑިއަމްގައި ކުޅުނު މި މެޗުން ބަލިވުމާއެކު، ޖޯޖް ޖީސަސްގެ އިރުޝާދުގެ ދަށުން ކުޅެމުން އައި އަލް ނަސްރުގެ މޮޅުވުމުގެ ސިލްސިލާ ވަނީ މެދުކެނޑިފައެވެ. މިއާއެކު، އަންގާރަ ދުވަހު އަލް ޚަލީޖާ ދެކޮޅަށް ކުޅޭ މެޗުން އަލް ހިލާލް މޮޅުވެއްޖެ ނަމަ، ތާވަލުގެ އެއްވަނައިގައި އޮތް އަލް ނަސްރާ ދެމެދު އޮތް ފަރަގު ދެ ޕޮއިންޓަށް ކުޑަވާނެއެވެ.

Ad by Hajj Corporation

މެޗުގެ ފުރަތަމަ ހާފުގެ މެދުތެރެއިން އަލް ގާދިސިއްޔާގެ މުހައްމަދު އަބޫ އަލް-ޝަމާތު ވަނީ ލަނޑެއް ޖަހައި އެ ޓީމަށް ކުރިހޯދައިދީފައެވެ. ނަމަވެސް، މެޗުގެ 39 ވަނަ މިނެޓުގައި މާސެލޯ ބްރޮޒޮވިޗް ތަނަވަސްކޮށްދިން ފުރުސަތަކުން ޔާއޯ ފީލިކްސް ވަނީ ލަނޑެއް ޖަހައި އަލް ނަސްރަށް ނަތީޖާ ހަމަހަމަކޮށްދީފައެވެ. އޭގެ ކުރިން ކްރިސްޓިއާނޯ ރޮނާލްޑޯ ފޮނުވާލި ހަމަލާއެއް ގޯލުގެ ހުރަސް ދަނޑީގައި ޖެހިފައިވެއެވެ.

ދެވަނަ ހާފު ފެށިގެން 10 މިނެޓު ތެރޭގައި އަލް ގާދިސިއްޔާގެ މުސާބް އަލް-ޖުވައިރު ވަނީ އެ ޓީމަށް އަލުން ކުރިހޯދައިދީފައެވެ. އަދި މެޗު ނިމެން 12 މިނެޓަށް ވެފައި ވަނިކޮށް، އަލް ނަސްރުގެ ޑިފެންސަށް ހެދުނު ގޯހެއްގެ ފައިދާ ނަގައި ހޫލިއަން ކީނޯނޭސް ވަނީ ތިންވަނަ ލަނޑު ޖަހައި އެ ޓީމަށް މޮޅު ކަށަވަރުކޮށްދީފައެވެ.

މި މެޗުގައި އަލް ނަސްރުގެ ފަރާތުން ފެނިގެންދިޔައީ އާދައިގެ ކުޅުމެކެވެ. އެ ޓީމަށް މުޅި މެޗުގައި ގޯލާ އަމާޒުކޮށް ފޮނުވާލެވުނީ އެންމެ ދެ ހަމަލާއެވެ. އަލް ގާދިސިއްޔާގެ ކީނޯނޭސް ވަނީ މި މެޗުގައި މޮޅު ކުޅުމެއް ދައްކައި، މި ސީޒަނުގައި އޭނާ ޖެހި 29 ވަނަ ލަނޑު ކާމިޔާބުކޮށްފައެވެ.
މި ބައްޔާއެކު ތާވަލުގެ ދެވަނައިގައި އޮތް އަލް ޙިލާލް އާއި ދެމެދުގައި ފަސް ޕޮއިންޓްގެ ފަރަގެއް އޮތްއިރު، އަލް ޙިލާޅް މިވަގުތު އޮތީ އެއްމެޗު މަދުން ކުޅެފައެވެ. އެހެންކަމުން އަންނަ ހަފްތާގައި އަލް ނަޞްރާއި އަލް ޙިލާލް ވާދަކުރާ މެޗުން މޮޅުވާ ބަޔަކަށް ލީގުގެ ކޮންޓްރޯލް ލިބޭނެއެވެ. އެޔަށްފަހު ލީގުގައި ކޮންމެ ޓީމަކަށްވެސް ބާކީ އޮންނާނީ އެންމެ މެޗެކެވެ.