ރާއްޖެއިން މިއަހަރުގެ ޙައްޖުގައި ބައިވެރިވާ ޙައްޖު މިޝަންގެ ޓީމް، ސަޢުދީއަށް ފުރައިފިއެވެ. މި ދަތުރުގައި ހައްޖު ކޯޕަރޭޝަންގެ 15 ބޭފުޅުން ފުރުމަށްވަނީ ހަމަޖެހިފައެވެ.

މޯލްޑިވްސް ހައްޖު ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ޝަކީލް ވިދާޅުވީ،މި ޓީމުގެ މައިގަނޑު މަސައްކަތަކަށް ވާނީ، މިމަހުގެ 15 ގައި ޙައްޖަށްދާ ޙައްޖުވެރިން ފުރުމުގެ ކުރިން ސަޢުދީގައި ފުރިހަމަ ކުރަންޖެހޭ އެންމެހާ ކަންކަން ބަލައި އިންތިޒާމުތައް ހަމަޖެހިފައިވާކަން ކަށަވަރު ކުރުންކަަމަށެވެ. އެގޮތުން މައްކާ ހޮޓަލާއި، ޙައްޖުގެ މަޝާޢިރުތަކާއި، ދަތުރުފަތުރާއި، ކެންއިންބުއިމާއި، ސިއްޙީ އެންމެހާ އިންތިޒާމްތަކާއި ތައްޔާރީތައް ބަލާ، ސަޢުދީ ޙައްޖު މިނިސްޓްރީގެ މިންގަނޑަށް ހަމަޖައްސަފަވާކަން ކަށަވަރު ކުރާނެ ކަމަށް ޝަކީލް ވިދާޅުވިއެވެ.

Ad by Hajj Corporation

"ދެން މިއަދު މި ފުރާ 15 ބޭފުޅުންގެ ޓީމް ހަމަ ރެއާ ދުވާލު މަސައްކަތްކޮށް،މިމަހަުގެ 15 ވަނަ ދުވަހު ފުރާ ހައްޖުވެރިންގެ ފުރަތަމަ ގްރޫޕް މައްކާއަށް ވަޑައިގަންނަން ވާއިރަށް މައްކާގަ ދިވެހި ހައްޖުވެރިންނަށް މަރުހަބާ ކިޔުމަށްޓަކާ ވާންޖެހޭ ހުރިހާ ތައްޔާރީތަކެއެް އިރާދަކުރެއްވިއްޔާ ކޮން ނިންމާނެ" ހައްޖު ކޯޕަރޭޝަންގެ އެމްޑީ މުޙައްމަދު ޝަކީލް

މީގެއިތުރުން ޝަކީލް ވިދާޅުވީ،ހައްޖު ކޯޕަރޭޝަންގެ މަޤްސަދަކަށް އަބަދުވެސް ވާނީ ކަންކަން އިތުރަށް ފުރިހަމަކޮށް ރަނގަޅުކުރުން ކަމަށާއި،މިގޮތުން މިއަހަރުގެ ހައްޖުގެ އިންތިޒާމްތައް މިދިޔަ އަހަރަށް ވުރެ ރަނގަޅު ކުރުމަށް މިހާރު ވާނީ ވަރަށް ގިނަ ކަންތައްތަކެއް ކޮށްފައިކަމަށެވެ.

އަދި ހައްޖުގެ އިންތިޒާމްތަށް ފުރިހަމަކުރަމުން ދިޔައިރު މަދުވެގެން ހަފްތާއަކު އެއްދުވަހު ރައިސުލްޖުމްހޫރިއްޔާ ޑރ.މުހައްމަދު މުއިއްޒު ގުޅުއްވާ،ހައްޖުގެ ތައްޔާރީތަކާ ބެހޭ މައުލޫމާތު ސާފުކުރައްވާ،އަދި އިތުރަށް ރަނގަޅުކުރަން އެމަނިކުފާނަށް ފެނިވަޑައިގަންނަވާ ބައެއް ކަންތައްތައް ހިއްސާކުރައްވާފައިވާކަމަށް ވެސް ޝަކީލް ވިދާޅުވިއެވެ.

އަދި އެ ކޯޕަރޭޝަނުން މިހާރު ވާނީ އެމަނިކުފާނު އެދިވަޑައިގެންނެވި ގޮތަށް އެކަންކަން ފުރިހަމަކޮށްފައިކަމަށް ވެސް ޝަކީލް ވިދާޅުވިއެވެ.