ކުރީގެ ބަންޑާރަނައިބު އަދި މަޝްހޫރު ގާނޫނީ ވަކީލު އައިޝަތު އާޒިމާ ޝަކޫރު، ސޯޝަލް މީޑިއާގައި މީހަކު ކުރި ފުރައްސާރައަކާ ގުޅިގެން ހަގީގަތް ހާމަކޮށްދެއްވައިފިއެވެ. އާޒިމާ މިކަމަށް ރައްދު ދެއްވާފައިވަނީ ވަރަށް މަޑުމައިތިރިކަމާއެކު، ކަން އޮތްގޮތް ސާފުކޮށްދެއްވަމުންނެވެ.

އާޒިމާގެ ވާހަކައިގައި މައިގަނޑު ގޮތެއްގައި އަލިއަޅުއްވާލާފައިވަނީ އޭނާގެ އާއިލާއާއި އައްބާސް ޝަރީފާ އޮތް ގާތް ގުޅުމުގެ މައްޗަށެވެ. އާޒިމާ ވިދާޅުވީ އޭނާގެ މަންމަގެ ބައްޕަ (ސިނީގެ ހުސައިން މަނިކު) އާއި އައްބާސް ޝަރީފްގެ ބައްޕަގެ މާމަ (ސިނީގެ ފާތިމަތު މުހައްމަދު) އަކީ އެއްބަނޑުއެއްބަފާ ދެބެން ކަމަށެވެ. އަދި އައްބާސްގެ ކާފަ، ވައިނުޖެހޭގޭ ހަސަންމަނިކަކީ އާޒިމާގެ މަންމަގެ ބަލަދުވެރިޔާ ކަމަށްވެސް ފާހަގަކުރެއްވިއެވެ.

Ad by Hajj Corporation

އާޒިމާ އިތުރަށް ވިދާޅުވީ، އޭނާގެ މަންމަ ދުނިޔެއަށް އައުމުގެ ކުރިން މަންމަގެ ބައްޕަ ނިޔާވުމުން، މަންމަގެ ހުރިހާ ކަމެއް ބެލެހެއްޓެވީ އައްބާސްގެ ކާފަ ހަސަންމަނިކު ކަމަށެވެ. "އަޅުގަނޑުމެން ބޮޑެތިވަމުން އައި އިރު، ދޮންބޭބެއަކީ ވަރަށް މުހިންމު ބޭފުޅެކެވެ. މަންމަ ޔަތީމުވެގެން ދިޔަ ދުވަހުވެސް މަންމަ ދޫކޮށްނުލެއްވި ބޭފުޅުންނެވެ،" އާޒިމާ ލިޔުއްވާފައިވެއެވެ.

އާއިލީ ގުޅުންތަކުގެ މައްޗަށް ވާހަކަ ދައްކަވަމުން އާޒިމާ ވިދާޅުވީ އައްބާސް ޝަރީފަކީ އޭނާއަށްވުރެ ހަގު ކޮއްކޮއެއް ކަމަށާއި، މިހާރުވެސް ދެ އާއިލާގެ މެދުގައި އޮންނަނީ ވަރަށް ގާތް ތިމާގެ ގުޅުމެއް ކަމަށެވެ. އެހެންކަމުން، އެކްސްގައި އައްބާސްއާ މެދު ހަޑިހުތުރު ވާހަކަތަކެއް ފަތުރަމުންދާތީ އެކަމުގެ ހަގީގަތް ހާމަކުރަން ޖެހުނީ ކަމަށް އާޒިމާ ވިދާޅުވިއެވެ.

ސިޔާސީ ހަޔާތުގައި ބުލީ ކުރުމާއި، ހަނގާކުރުމާއި، އަދި ފުރާނައަށް ނުރައްކާކުރުން ފަދަ ކަންކަމާ ކުރިމަތިލާފައިވާކަން ފާހަގަކުރައްވަމުން އާޒިމާ ވިދާޅުވީ އެފަދަ ކަންކަމާ ކަންބޮޑުނުވާ ކަމަށެވެ. ނަމަވެސް، އާއިލީ އިންތަކަށް ވަންނަން ފެށުމުން އެއްޗެއް ބުނަން މަޖުބޫރުވީ ކަމަށް އޭނާ ވިދާޅުވިއެވެ.

އާޒިމާގެ މި ވާހަކަތަކުން ދޭހަވަނީ، ކަންކަމުގެ ހަގީގަތް ބެލުމެއްނެތި މީހުން ބަދުނާމުކުރުމުގެ ސަގާފަތާ މެދު އޮތް ކަންބޮޑުވުމެވެ. އަދި އާއިލީ ގުޅުންތަކަށް އިހުތިރާމް ކުރުމުގެ މުހިންމުކަން އޭނާ ވަނީ ފާހަގަކުރައްވާފައެވެ.