މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިންތިޒާމުކޮށްގެން ބާއްވާ "ފައިނޭންޝަލް އެކްސްޕޯ" މިއަހަރުގެ ޖޫން މަހު ބޭއްވުމަށް ނިންމައިފިއެވެ.

އެމްއެމްއޭ އިން ނެރުނު ބަޔާނެއްގައި ބުނީ، މި އެކްސްޕޯ ކުރިއަށް ދާނީ އަންނަ ޖޫން މަހުގެ 2 އިން 4 އަށް ހުޅުމާލޭ ސެންޓްރަލް ޕާކުގައެވެ.

Ad by Hajj Corporation

މި އެކްސްޕޯ ބޭއްވުމުގެ މައިގަނޑު މަގުސަދަކީ މާލީ ހިދުމަތް ފޯރުކޮށްދޭ ފަރާތްތަކާއި، ކަމާބެހޭ އެހެނިހެން އިދާރާތަކާއި އާންމު ރައްޔިތުން އެއްތަނަކުން ބައްދަލުވެ، މާލީ ހިދުމަތްތަކާ ގުޅޭ ފުރިހަމަ މައުލޫމާތު ފޯރުކޮށްދިން ކަމަށް އެމްއެމްއޭ އިން ވަނީ ބުނެފައެވެ. އަދި މިއީ ރާއްޖޭގެ މާލީ ދާއިރާ އިތުރަށް ހަރުދަނާކޮށް ކުރިއެރުވުމަށްޓަކައި އެމްއެމްއޭ އިން ކުރިއަށްގެންދާ މުހިންމު މަސައްކަތެއް ކަން ވެސް ވަނީ ފާހަގަކޮށްފައެވެ.

މި އެކްސްޕޯގެ ތެރެއިން މާލީ ދާއިރާގައި ހަރަކާތްތެރިވާ ތަފާތު އިދާރާތަކުން ފޯރުކޮށްދޭ ހިދުމަތްތައް އާންމުންނަށް އެއްތާކުން ލިބިގެންދާނެއެވެ. މީގެ އިތުރުން، ހިދުމަތްދޭ ފަރާތްތަކުން އަލަށް ތައާރަފުކުރާ ހިދުމަތްތައް އިފްތިތާހް ކުރުމުގެ ހަރަކާތްތައް ވެސް މި އެކްސްޕޯގެ ތެރޭގައި ކުރިއަށްދާނެ ކަމަށް އެމްއެމްއޭ އިން މައުލޫމާތުދެއެވެ.

މި ފައިނޭންޝަލް އެކްސްޕޯއަކީ މާލީ ދާއިރާއަށް އާންމުން ހޭލުންތެރިކުރުވުމަށާއި، ބޭންކުތަކާއި އިންޝުއަރެންސް ކުންފުނިތަކުގެ ހިދުމަތްތައް ރައްޔިތުންނާ ގާތުން ފޯރުކޮށްދިނުމަށް ހުޅުވިގެންދާ ރަނގަޅު ފުރުސަތެކެވެ.

އެންމެ ފަހުން އެމްއެމްއޭ އިން ފައިނޭންޝަލް އެކްސްޕޯ ބާއްވާފައިވަނީ 2017ވަނަ އަހަރުއެވެ. އަދި އޭގެ ކުރިން 2015ވަނަ އަހަރު ވެސް އެކްސްޕޯ ބާއްވާފައިވެއެވެ.