މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަހަރު އަލަށް "މޯލްޑިވްސް ފައިނޭންޝަލް ސެކްޓާ އެވޯޑްސް" ތައާރަފްކޮށް، ޖުމްލަ ހަތް ދާއިރާއަކުން އެވޯޑް ދިނުމަށް ނިންމައިފިއެވެ.

އެމްއެމްއޭ އިން ނެރުނު ނޫސްބަޔާނެއްގައި ބުނީ ރާއްޖޭގެ މާލީ ދާއިރާ އިތުރަށް ހަރުދަނާކޮށް ކުރިއެރުވުމަށް އެމްއެމްއޭ އިން މިއަހަރު އަލަށް ދޭން ފަށާ އެވޯޑުތަކަކީ، މާލީ ދާއިރާގައި ފާހަގަކޮށްލެވޭ ހިދުމަތްތައް ކުރާ ފަރާތްތަކުގެ އަގުވަޒަންކުރުމުގެ ގޮތުން ދެވޭ އެވޯޑުތަކެއް ކަމަށެވެ. މިއަހަރު މި އެވޯޑް ދިނުމަށް ހަމަޖެހިފައިވަނީ މާލީ ދާއިރާގެ އެކި ދާއިރާތަކުން ޖުމްލަ 7 ގިންތިއަކުންނެވެ.

Ad by Hajj Corporation

އެގޮތުން މާލީ ނިޒާމު ހަރުދަނާ ކުރުމަށް އެމްއެމްއޭ އިން އެންމެ އިސްކަމެއްދޭ ދާއިރާތަކުގެ ތެރޭގައި ހިމެނޭ، ފައިނޭންޝަލް އިންކްލޫޝަން، ފައިނޭންޝަލް ލިޓްރޭސީ، ޑިޖިޓަލް ފައިނޭންސް، ސްމޯލް އެންޑް މީޑިއަމް އެންޓަޕްރައިސް (އެސްއެމްއީ) ފައިނޭންސް، އަދި ގްރީން އެންޑް ސަސްޓެއިނަބަލް ފައިނޭންސް ފަދަ ދާއިރާތައް ހިމެނޭ ކަމަށް އެމްއެމްއޭ އިން ވަނީ މައުލޫމާތު ދީފައެވެ.

މި އެވޯޑުތަކަށް ނަން ހުށަހެޅުމުގެ ފުރުސަތު މިހާރު ހުޅުވާލާފައިވާއިރު، އެވޯޑް ލިބޭ ފަރާތްތައް އިއުލާން ކުރަން ހަމަޖެހިފައިވަނީ އެކަމަށް ޓަކައި ހާއްސަކޮށް ބޭއްވޭ ރަސްމިއްޔާތެއްގައި ކަމަށް އެމްއެމްއޭ އިން ބުންޏެވެ.

މި ރަސްމިއްޔާތު ބޭއްވުމަށް ހަމަޖެހިފައިވަނީ ޖުލައި މަހުގެ 1ވަނަ ދުވަހުއެވެ.