އެމެރިކާގެ ރައީސް ޑޮނަލްޑް ޓްރަމްޕް، އެ ގައުމުގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) ގެ ކޮމިޝަނަރު މާޓީ މަކަރީއަށް ވަރަށް ބޮޑަށް ކޯފާވެ، ފާޑުވިދާޅުވެފައިވާ ކަމަށް ރިޕޯޓުތައް ބުނެފިއެވެ. ވޯލް ސްޓްރީޓް ޖާނަލްއިން ރިޕޯޓުކޮށްފައިވާ ގޮތުގައި، މި ނުރުހުން އަމާޒުވީ ފްލޭވާޑް ވޭޕް އަދި ނިކޮޓިން އެކުލެވޭ އުފެއްދުންތައް ބާޒާރަށް ނެރުމުގެ ހުއްދަ ދިނުމުގައި މަކަރީ ލަސްތަކެއް ކުރިމަތިކުރުވާ ކަމަށް ބުނެއެވެ.

ވައިޓް ހައުސްއާއި ފްލޮރިޑާގައި ހުންނަވައިގެން ޓްރަމްޕް ކުރެއްވި ފޯނު ކޯލްތަކެއްގައި، މަކަރީގެ މަސައްކަތްތަކާ މެދު ލަފާ ހޯއްދަވާފައިވާ ކަމަށްވެއެވެ. ޚާއްސަކޮށް، ޒުވާން 'މާގާ' (MAGA) ސަޕޯޓަރުންގެ މެދުގައި ފްލޭވާޑް ވޭޕްގެ މަގުބޫލުކަން އޮތް މިންވަރާއި، އެކަމުގެ ސިޔާސީ މުހިންމުކަމާ ގުޅޭގޮތުން ރައީސް މަޝްވަރާ ކުރެއްވި ކަމަށް ޚަބަރުތައް ބުނެއެވެ.

Ad by Hajj Corporation

ރައީސް ޓްރަމްޕްގެ މުޝީރުން ވަނީ މަކަރީއަކީ ސަރުކާރުގެ 'ވޭޕިން އެޖެންޑާ' އަށް ހުރަސްއަޅުއްވާ ބޭފުޅެއްގެ ގޮތުގައި ސިފަކުރައްވާފައެވެ. "މަކަރީ ވަނީ ޓްރަމްޕްގެ ވޭޕިން އެޖެންޑާ ހުއްޓުވާފައި، އަދި އޭނާއަކީ މި ސަރުކާރަށް އޮތް މައްސަލައެއްގެ ގޮތުގައި މުޝީރުން ރައީސަށް ދެންނެވި،" ކަމަށް ޖާނަލްގެ ރިޕޯޓުގައިވެއެވެ.

މި އަހަރުގެ ކުރީކޮޅު ޓްރަމްޕްގެ ސަރުކާރުން ފްލޭވާޑް ވޭޕް އުފެއްދުންތައް އިތުރުކުރުމަށް މަސައްކަތް ކުރި ނަމަވެސް، މަކަރީގެ އޮފީހުން ނެރުނު މެމޯއަކާ ގުޅިގެން ބައެއް ފްލޭވާތަކަށް ހުއްދަ ދިނުން ވަނީ ހުއްޓިފައެވެ. މީގެ ސަބަބުން މަކަރީ މިހާރު ހުންނެވީ މަގާމުން ވަކިކޮށްފާނެ ފަދަ ނުރައްކާތެރި ފައްތަރެއްގައި ކަމަށް މަސްދަރުތަކުން ބުނެއެވެ.

އެންމެ ފަހުގެ މައުލޫމާތުތަކަށް ބަލާއިރު، މަކަރީއާއި ޓްރަމްޕް ވަނީ މި މައްސަލައިގައި މަޝްވަރާ ކުރައްވާފައެވެ. ނަމަވެސް، ފްލޭވާޑް ވޭޕްތަކާ މެދު ގެންގުޅުއްވާ ހަރުކަށި އުސޫލުތައް ބަދަލުކުރެއްވުމަށް މަކަރީ ނިންމަވާފައިވާކަން ނުވަތަ ނޫންކަން އަދި ސާފެއް ނުވެއެވެ.