ޒާތީ މައުލޫމާތު ރައްކާތެރިކުރުމުގެ ޑޭޓާ ޕްރޮޓެކްޝަން ބިލެއް ކުރިއަށް އޮތް ދެ ތިން ދުވަހުގެ ތެރޭގައި ރައްޔިތުންގެ މަޖިލިހުގެ ދައުރުގެ ތެރޭގައި ހުށަހަޅުއްވާނެ ކަމަށް ބަންޑާރަނައިބު އަހުމަދު އުޝާމް މިއަދު ވިދާޅުވެއްޖެއެވެ.

ރައީސް އޮފީހުގައި ބޭއްވި ޕްރެސް ކޮންފަރެންސްގައި އުޝާމް ވިދާޅުވީ ބަންޑާރަ ނައިބުގެ އޮފީހުން ވަރަށް މުހިންމު ބިލްތަކެއްގެ މަސައްކަތް ކުރިއަށް ގެންދާ ކަމަށެވެ. އެގޮތުން މި މަޖިލިހުގެ މި ދައުރުގައި އެ ބިލްތައް ހުށަހަޅަން ވަރަށް މުހިންމު ބިލްތަކެއްގެ މަސައްކަތް ކުރިއަށްދާ ކަމަށް އޭނާ ވިދާޅުވިއެވެ.

Ad by Hajj Corporation

"މިއީ އާންމު ރައްޔިތުންގެ ޒާތީ މައުލޫމާތު ރައްކާތެރިކުރުމުގެ ގޮތުން ހާމަކަން ބޮޑު، ޖަވާބުދާރީ ކުރުވަނިވި ގޮތެއްގައި އެ މައުލޫމާތު އެއްކުރުމާއި، ޕްރޮސެސްކުރުމާއި، ބޭނުންކުރުމުގެ ނިޒާމެއް ގާއިމުކޮށް، ޒާތީ މައުލޫމާތު ނިސްބަތްވާ މީހުންގެ ހައްގުތަކާ މައުލޫމާތު އެއްކުރާ އަދި ޕްރޮސެސްކުރާ ފަރާތްތަކުގެ ޒިންމާތައް ކަނޑައަޅާ، އެ ފަރާތްތައް ރެގިއުލޭޓުކުރުމާ ބެހޭ އުސޫލުތައް ކަނޑައަޅާނެ ބިލެއް، ގާނޫނެއް،" އުޝާމް ވިދާޅުވިއެވެ.

އުޝާމް ވިދާޅުވި ގޮތުގައި އެ ބިލްގެ މަސައްކަތް ކުރަމުން އަންނަތާ ވަރަށް ގިނަ ދުވަސްތަކެއް ވަނީ ވެފައެވެ. މި ބިލަކީ ބޭރުގެ އެކިއެކި ފަރާތްތަކުގެ އެހީގައި ފަރުމާ ކުރެވިފައިވާ ބިލެއް ކަމަށް ވެސް އުޝާމް ވިދާޅުވިއެވެ. މި ބިލް ތައްޔާރު ކުރުމުގައި ދައުލަތުގެ ވަރަށް ގިނަ އިދާރާތަކެއްގެ އެހީތެރިކަން ލިބުނު ކަމަށް ވެސް ވިދާޅުވިއެވެ.

އެ ބިލާއެކު މަޖިލިހުގެ މި ހިނގާ ދައުރަށް ޖުމްލަ 12 ބިލެއް ހުށަހެޅުމަށް ތައްޔާރުވަމުން އަންނަ ކަމަށް ބަންޑާރަ ނައިބު ވަނީ ވިދާޅުވެފައެވެ. ނޫސްވެރިންގެ ބައްދަލުވުމުގައި ބަންޑާރަ ނައިބު ވަނީ ސަރުކާރުގެ ފަރާތުން މަޖިލީހަށް ހުށަހަޅަން ތައްޔާރުވެފައިވާ ބިލުތަކުގެ ތަފްސީލު ހިއްސާކުރައްވައިފައެވެ.

ޒާތީ މައުލޫމާތު ރައްކާތެރިކުރުމުގެ ބިލެއް ހުށަހަޅަން ނިންމިކަން ހާމަކުރެއްވިއިރު، މިހާރު އާންމުންގެ މެދުގައި އެންމެ ކަންބޮޑުވުން އޮތް އެއް މައްސަލައަކީ ވެސް އެއީއެވެ.