ދިފާއީ އަދި ވަތަނީ ޚިދުމަތާ ބެހޭ ވަޒީރު ހަސަން ރަޝީދާއި އޮސްޓްރޭލިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޑޭވިޑް ޖެސަޕް ބައްދަލުކުރައްވައި، ދިފާއީ ދާއިރާއިން މީހުން ބިނާކުރުމާއި ކަނޑުގެ ސަރަހައްދުގެ ސަލާމަތާ ގުޅޭ ގޮތުން ފުޅާ ދާއިރާއެއްގައި މަޝްވަރާކުރައްވައިފިއެވެ.

ސަފީރު ޖެސަޕް ވަޒީރުގެ އަރިހަށް ކުރެއްވި އިހުތިރާމުގެ ޒިޔާރަތުގައި ކުރިއަށް ދިޔަ މި ބައްދަލުވުމުގައި ދެ ގައުމުގެ މަސްލަހަތާ ގުޅޭ ގިނަ ދާއިރާތަކަކުން ވާހަކަ ދެކެވުނެވެ. ދިފާއީ ވުޒާރާއިން ހާމަކުރި ގޮތުގައި، ކަނޑުގެ ސަރަހައްދު ހިމާޔަތްކުރުމާއި އިންސާނީ ވަސީލަތް ތަރައްގީކުރުމާއި ސަރަހައްދީ ހަމަޖެހުން ދެމެހެއްޓުމަށް ހާއްސަ އިސްކަމެއް ދީގެން މަޝްވަރާ ކުރެވުނެވެ.

Ad by Hajj Corporation

މި ބައްދަލުވުމުގައި ވަޒީރު ހަސަން ރަޝީދު ވަނީ ރާއްޖޭގެ ދިފާއީ ގާބިލުކަން އިތުރުކުރުމަށް އޮސްޓްރޭލިއާއިން ދެމުންދާ އެހީތެރިކަމަށް ޝުކުރު އަދާކުރައްވައިފައެވެ. އަދި ދެ ގައުމުގެ ގުޅުން އިތުރަށް ވަރުގަދަކުރުމަކީ ސަލާމަތީ ގޮންޖެހުންތަކަށް ގުޅިގެން އިޖާބަ ދިނުމަށް ކޮންމެހެން ބޭނުންތެރި ކަމެއް ކަމުގައި ވަޒީރު ފާހަގަކުރެއްވިއެވެ.

އޮސްޓްރޭލިއާއަކީ ރާއްޖޭގެ ދިފާއީ ދާއިރާއަށް ބޮޑެތި އެހީތައް ފޯރުކޮށްދޭ ގައުމެކެވެ. އެ ގޮތުން އެންމެ ފަހުން އޮސްޓްރޭލިއާ ސަރުކާރުން ދިވެހި ސިފައިންނަށް "ގާޑިއަން ކްލާސް" ޕެޓްރޯލް ބޯޓެއް ހަދިޔާކޮށްފައިވާއިރު، ދިވެހި ސަރުކާރުން ބުނެފައި ވަނީ އެއީ ސަރަހައްދީ ސަލާމަތް ކަށަވަރުކުރުމުގެ މަސައްކަތުގެ ތެރެއިން ހޯދި ބޯޓެއް ކަމަށެވެ.